Willemstad – Clifton End ta bek ku otro produkshon ku manera ya ta kustumber, ta priminti di tembla kaya. ‘KANDELA’ ta parti di e serie kansionnan Rítmiko manera ‘Slow Dance’ ku Ephrem J i mas resientemente ‘Morena’.  Ainda mester sali ‘Baila Conmigo’ pa asina klousura un etapa musikal di Clifton su karera, unda ela marka pouta den e generonan di Kizomba, Reggaeton i Ritmo Kombina.

E EP tan espera ku tentativamente titula Mi Pais, ketu bai ta plania pa sali fin di aña aki. E promé piesa, ta e ‘cover’ di ‘Mi Pais’,  un homenahe na nos dushi isla, originalmente komposita i kanta pa Ced Ride. Un kantika ku tambe lo sali riba e EP aki, ta e kolaborashon ku e banda Buleria. Meskos ku nan a invita Clifton riba ‘Wat Is Je Naam’, awó ta turno di talentoso banda rubiano pa kolabora ku Clifton, unda spesifikamente kantante Buddy lo tuma e enkargo. Clifton tabata asina impreshona ku Buddy su abilidat nan vokal ku e kier a kolabora un bes más ku e talentoso kantante. E piesa ‘top secret’ tambe ta plania pa salí fin di aña.

‘KANDELA’

“E proseso pa krea ‘KANDELA’ a bai hopi vlot i nos ta orguyoso ku e resultado final”, Clifton a kompartí, unda huntu ku Vincent da Silva Jr. nan a skibi i aregla e piesa den un anochi. E kantika ta un meks di papiamentu, spaño i ingles ku ta papia un amor ardiente ku mester keda sasiá. ‘KANDELA’ ta un kolaborashon ku e talentoso produktor di Kizomba PutoX, huntu ku Vincent da Silva Jr. i Sonic Wizards.  

2021 lo ta ‘soulful’

Manera Clifton a anunsia anteriormente, ora aña boltu, e ta bai bek na su promé amor, kual ta músika ‘soul’ unda e ta plania pa lansa algún piesa en espera di su álbum dedika na e genero aki. Clifton no por warda pa e pandemia di COVID-19 ta tras di lomba pa asina  medidanan ront di farándula por normalisa atrobe. Ora e momentu oportuno presenta, Clifton ke regresa nos islanan pa algún presentashon unda pueblo por selebra responsablemente ku otro.    

No keda sin pidi pa ‘KANDELA’ na tur radio emisora i televishon popular di nos islanan i sigui Clifton End riba Facebook/BuzzBinProductions pa keda na altura di futuro produkshonnan. Pa presentashon, mail BuzzBin Productions na Media@buzzbinproductions.com pa más informashon. 

Bo por chèk ‘KANDELA’ riba YouTube i Spotify