Federashon Futbòl Kòrsou (FFK), Select Automotive (Volkswagen) i Curaçao Beverage Bottling Company (Coca-Cola) a uni forsa ekstendiendo un invitashon na tur ekipo di futbòl huntu ku nan fanátikonan pa sostené nan ekipo faborito i tene nos isla limpi pa medio di resiklahe di bòternan di plèstik i bleki di aluminio ku chèns pa gana premionan kèsh. Durante e periodo di 1 di novèmber te ku 22 di dezèmber aña pasá, tur ekipo partisipante por a partisipá pa gana premionan di plaka kèsh resiklando mas tantu bòter PET, tapanan HDPE, bòternan di líkido pa limpiesa i bleki di aluminio posibel. 

Miembro-, fanátiko-, famia- i koleganan di kada ekipo por a entregá nan produktonan resiklabel na Green Phenix, Paviljoen Zeelandia kaminda a pisa tur bòter- i blekinan bashí i registrá esaki nan.

Premionan kèsh

Pa kada 10 kilo di produktonan resiklabel kolekshoná, e ekipo ta risibí un lòt ku chèns pa gana 250 florin kèsh. Mas plèstik e ekipo kolekshoná, mas chèns e ekipo tabatin pa gana un premio. E ekipo ku kolekshoná mas kilo tabatin e chèns pa gana 1.000 florin. Volkswagen i Coca-Cola a pone 15 lòt, kada un na balor di 250 florin disponibel pa rifanan adishonal. Esaki ta un total di 4.750 florin na premio kèsh.

Esnan ku a entregá produktonan resiklabel a risibí un sertifikado di partisipashon na e ‘Kampeonato di Resiklahe 2022’.

Djaluna 27 di mart ultimo a tuma lugá entrega di premio na e vèlt di FFK.

E ekiponan ku a partisipá tabata: Steenrijk Boys (1.00 kg), Undeba (2.75 kg), Vesta (4.40 kg), Willemstad (5.75 kg), Jong Colombia (6.10 kg), C S D Barber (7.95 kg), Inter Willemstad (17.55 kg), Centro Dominguito (17.65 kg), Victory Boys (20.25 kg), Scherpenheuvel (38.20 kg), SUBT (48.20 kg), Jong Holland (53.10 kg), Excellence School (59.35 kg), S V Centro Juve (110.15 kg) i Atlétiko Saliña (311.00 kg).

E ganadó di e premio prinsipal di 1.000 florin a resultá e ekipo di Atlétiko Saliña.

Konsientisashon

Pa FFK, Volkswagen i Coca-Cola ta hopi importante pa nos ta mas konsiente tokante di sushi di kas. E meta di e kampaña tabata pa krea konsientisashon, redusí polushon di plèstik i oumentá kolekshon di produktonan resiklabel. Tambe pa konsumidónan por mira e produktonan aki komo materialnan fásil pa resiklá i asina duna e bòter – i blèkinan aki un bida nobo.