Willemstad – Maduro & Curiel’s Bank, spònser prinsipal di Kampeonato di softball di Curaçaose Softball Bond, ta kontentu di anunsiá ku e kampeonato 2015 Klase-AA i A ta ranka sali diadumingu awor 9 di ougùstùs for di 11 or di mainta na Sabana Ball Park ku weganan di Klase-A. Pa 5 or di atardi tin e último wega di apertura di e kampeonato nobo ku lo ta interesante entre Pichingolo Nissan i Sta. Rosa Angels Vanddis.

Kampeonato di sòftbòl femenino di CSB ta konsistí di Doble-A, Klase-A di 5 ekipo i un inter-liga entre tur ekipo kontra otro.

Maduro & Curiel’s Bank, E Amigu di Deporte, pa di tres aña konsekutivo ta demostrá ku e ta para tras di deporte di sòftbòl femenino na Kòrsou. E motibunan prinsipal ku MCB a skohe pa yuda e deporte di sòftbòl femenino ta pa e echo ku sòftbòl femenino tin hopi deportista femenino ku meresé un chèns pa desaroyá nan talento. E disiplina general bou di kua ta hunga e kampeonato di sòftbòl femenino di CSB ta di nivel hopi haltu i ta un di e deportenan ku ta kresiendo rápidamente pa loke ta talento i fanátiko.

MCB su patrosinio ta konsistí banda di e parti finansiero tambe di e parti di unifòrm pa umpire i scorer. MCB ta invitá tur fanátiko di sòftbòl femenino na apertura di kampeonato nobo di CSB-MCB djadumingu awor 9 di ougùstùs ku weganan for di 11 or di mainta na Sabana Ball Park.

Pa mas informashon yama Sr. Richard “Chati” Constancia na telefòn 560 2339