…den kuadro di Kopa Mundial Brazil 2014….

WILLEMSTAD- 9 di mei 2014:- Den e siman tras di lomba e gran mayoria di Kòrsou a bisti na oraño pa selebrashon di e promé Aña di Rei. For di fiestanan kantu di awa, sigui pa ferianan i aktividatnan sosial tur hende ku a forma parti di e selebrashon a duna realse na e koló oraño. Esaki a forma inisio di e ambiente oraño ku Kòrsou ke invitá e turista hulandes pa bin eksperensia  durante e temporada di Kopa Mundial Brazil 2014 tambe. Ku e kampaña ‘Welkom thuis in de Tropen’, Ofisina di Turismo di Kòrsou (CTB) ta invitá turistanan hulandes pa bin disfrutá di Kopa Mundial den un forma tropikal aki na Kòrsou. Kòrsou ta brinda tur loke e turista hulandes ke ora e ta apoyá su ekipo preferí durante weganan di mundial. E kolo oraño ta dominá tur kaminda ora ku e ekipo hulandes ta hunga meskos ku ta e kaso na Hulanda. E bentaha grandi ta ku aki bo tin bon wer garantisá. Por sigui e weganan riba pantaya grandi na diferente sitio i despues di kada wega tira un kabes mesora na laman. Poniendo énfasis riba Kòrsou su playanan bunita, hendenan amabel i naturalmente e echo ku pa añanan kaba Kòrsou ta un isla faborito pa hopi hulandes, ta invitá e turista hulandes pa bin Kòrsou komo un alternativa enbes di bai Brazil ku lo ta hopi drùk durante e temporada di mundial. Ademas biaha pa Kòrsou ta sali mas barata. Huntu ku sektor priva ta hinkando un kalènder oraño den otro ku lo keda distribuí den media hulandes i tambe riba medionan sosial. E kalènder lo ilustrá tur e sitionan ku e turista por bai durante e temporada di Kopa Mundial di Brazil i asina eksperensia e ambiente oraño.Loke ta hasi un vakashon na Kòrsou durante e temporada di mundial aún mas atraktivo ta ku e diferensia di ora ku Brazil ta solamente un ora pues e weganan por wòrdu mirá durante dia. CTB ta invitá pueblo di Kòrsou pa djòin e ambiente i brinda e turistanan ku lo ta di vakashon durante e temporada mundial e ‘sintimentu oraño’ pa asina nan eksperensiá e diferente weganan ku un tinta di e kultura hulandes.