WILLEMSTAD- 3 di yüni 2014:- E promé parti di e kampaña ‘Dare to Explore’ esta ‘Tribi pa Eksplorá Kòrsou’ a yega na su final dia 31 di mei último. Ta trata aki di e kampaña promoshonal ku Ofisina di Turismo di Kòrsou (CTB) a lansa na luna di mart último ku e meta pa invitá turistanan pa bin eksplorá nos isla. E kampaña ta brinda ofertanan masha atraktivo pa e turista por eksperensiá un vakashon inolvidabel na Kòrsou. Promoshon lo kuminsá bèk entrante 15 di yüli i ta terminá 15 di sèptèmber 2014. CTB huntu ku vários partner den industria turístiko a diseñá paketenan faborabel pa turistanan ku ta deseá di bishitá Kòrsou. E turista simplemente mester bishita wepsait di e kampaña kual ta www.curacao.com/explore i asina probechá di deskuentonan atraktivo na diferente hotèl, atrakshon i kompania di hür outo. E kampaña ta konsistí tambe di paketenan all-inclusive  i di buseo. E kampaña ‘Dare to Explore’ ta keda promoshoná tantu riba medionan sosial komo televishon. Riba entre otro e wepsait caribbeannewsdigital.com i den e korant elektróniko di Caribbean News Digital tambe a sali aviso di e kampaña. Pa televishon a lansa na luna di aprel 2 spòt di 15 sekònde ku ta pasando aktualmente na e aria di Florida (Miami & Ft. Lauderdale) i New York (Manhattan, Brooklyn & Bronx). Ku un total di 2500 spòt na CNBC, CNN, HeadlineNews, Travel channel, HGTV, MSNBC, TLC, National Geographic Channel, Travel Channel, DIY i hopi kanal mas. Pa wak e spòtnan aki bai riba: http://youtu.be/pvoVOZqQ7jQ i riba http://youtu.be/jZfaiAIs5Zw. E spòtnan ta yega na un kantidat di 3 mion persona. Un reportahe preliminar kompilá serka 10 di e partnernan ku ta kordiná e reservashonnan di e kampaña ta indiká ku  den e periodo tras di lomba e kampaña a produsí 1,508 booking ku un total di 3,092 pasahero ku ta keda un promedio di 6.2 anochi. Un total di 49% di e personanan ku a hasi nan reservashon a biaha pa Kòrsou den e periodo di mart pa mei último, 15 % lo biaha entre yüni pa ougùstùs i 36% lo biaha entre sèptèmber pa desèmber 2014. Di e 1,508 reservashonnan, 91% ta di personanan ku ta bini for di Estados Unidos, 1% for di Canada i 8% ta for di otro destinashonnan. Pues por bisa ku aunke e kampaña tabata dirigí riba e region di Estádos Unídos el a generá tambe reservashon for di otro destinashonnan. Ku e kampaña aki CTB ta sigui hasi su esfuersonan pa promové nos dushi isla Kòrsou. Kòrsou tin hopi di ofresé, p’esei ta invitá e turista pa tribi di bin eksplorá nos dushi isla Kòrsou i asina eksperensia kon úniko Kòrsou ta.