Komo Minister responsabel pa Enseñansa, Siensia, Kultura i Deporte, mi a tuma nota di e nesesidat serka nos siudadanonan i serka nos Parlamentarionan den representashon di pueblo pa nos pueblo por siña tur e 4 kuplètnan di nos himno nashonal i e nifikashon profundo ku esaki tin, ya asina nos por konsientisá nos pueblo mas pa biba e balornan ku nos Himno ta siña nos. Pa e motibu akí nos ta lansa e kampaña “Lanta nos BOS ban KANTA”. Ku e kampaña akí nos ke logra ku nos pueblo ta siña nos himno na maneranan partisipativo usando formanan kreativo. Pa logra esaki nos ta hasi un yamada na abo pa konhuntamente nos drenta den un temporada ku lo kuminsá 2 yüni 2015 ti lo dura te dia 2 yüli 2015, Dia di Bandera. Nos ke pa yuda nos pa logra ku alumnonan, empresanan, direktornan, lidernan, ministernan, Parlamentarionan, nos hende grandinan, empleadonan di supermerkadonan, empleadonan públiko i demas siudadanonan, kanta himno di Kòrsou na un manera vibrante i for di profundidat di nan kurason.

Ku e inisiativa akí nos ke logra diferente meta:

1. Krea un plataforma pa esnan ku sa nos himno for di nan kabes i ku por kant’é for di profundidat di nan kurason i ta orguyoso di esaki pa por demostrá esaki;
2. Konsientisá esnan ku pa un motibu òf otro no ta kòrda nos himno kompletamente, riba e echo ku a yega tempu pa nos ban sa nos himno for di kabes i motivá e personanan akí pa kanta esaki sin miedu i ku vervor;
3. Hasi uso di e oportinidat akí pa kompartí nos himno ku tur grupo étnikonan den nos komiunidat i turistanan pa nan tambe sa kada letra, kada strofa i kada kuplèt i nan nifikashon.
4. Motivá nos gruponan deportivo i kultural pa kompartí nos himno na eventonan internashonal;
5. Logra pa trese korekshon segun nos partitura ofisial, den forma di kanta e parti final di nos himno, ya ku diferente hende ta hasi esaki na diferente manera komo tin un forma pa hasi esaki korekto ku ta segun e partitura.

E kampaña “Lanta nos BOS ban KANTA” ta pa tur edat pues di 0-100+ aña.

Lo tin aktividatnan pa e diferente kategorianan di edat, spesialmente tambe pa nos grupo entre 0-4 aña ku por kanta nos himno. Nos lo bai tin un página wèp interaktivo [‘website’: www.korsousuhimno.com], un página di ‘Facebook’ i ‘whatsapp’ [5999-513 6519], kaminda tur hende por partisipá. Intenshon ta pa manda sea vídio, pòrtrèt kaminda pueblo ta demostrá ku diferente gruponan ta dediká atenshon na Himno di Kòrsou na diferente forma. Tambe lo bai tin diferente “talkshow” i preguntanan via medionan di komunikashon kaminda ku pueblo lo por partisipá aktivamente. Nos ke rekordá tur skol di Enseñansa Fundeshi ku ya un par di aña pasá nan a risibí informashon riba un DVD via Fundashon Material pa Skol tokante nos Himno i Bandera i ku den e siman akí nan i otronan por hasi uso di e materialnan akí pa konsientisá tantu nos muchanan, komo personal di skol i mayornan mas riba e reglanan mará na himno i bandera, e kontenido i nifikashon di nos himno. Tambe riba nos página wèp www.korsousuhimno.com lo por haña tur informashon. Nos ke hasi un yamada na tur miembro di prensa i medionan di komunikason di Kòrsou pa hasi uso di ehèmpelnan indiká den e anekso pa por aportá na engrandesé nos himno di manera ku nos pueblo por sa mas di nos Himno anto pa dia 2 yüli próksimo – i pa awe padilanti, nos pueblo sa kon Lanta BOS i KANTA nos himno kompleto i ku fervor. ABO su aporte ta di gran balor!