Fundashon Prevenshon (FP) huntu ku Rotary riba promé di febrüari 2021 a kuminsá ku un kampaña di konsientisashon. E meta tabata pa stimulá nos komunidat pa motivá nos hende muhénan entre 45 i 75 aña pa aseptá invitashon di FP pa kada 2 aña laga hasi un saminashon di pechu ku e aparato di mamografia 3D nobo.

E kampaña tabata mustra historia di 4 personahe. Riba billboard, den propaganda diario na televishon i radio i riba medionan sosial, tabata pará sentral un señora, ku ta risibí un invitashon di Fundashon Prevenshon pa bai hasi e saminashon di pechu. Su kasá, mama i yu muhé ta sostené pa e aseptá e invitashon. E señora mes ta disidí di kombertí su bishita na Fundashon Prevenshon den un paseo, huntu ku su amiga. Tur esnan involukrá tin interes pa e senora akí praktiká kuido preventivo pa ku su salú. E aktornan ku a koperá ku e produkshon ta: Sheila Payne, (ròl di mama), Milien Vicario (ròl di yu muhé), Luckshon Valks (ròl di tata), Jessica Damon (ròl di wela).

Un dunadó di trabou tin probecho di bon kuido di salú pa ku su empleadonan femenino. A aserká departamentunan di Rekurso Humano pa FP por a hasi presentashon di informashon pa e empleadonan. Durante presentashon a kontestá pregunta, a splika tópikonan ku no tabata asina kla, i a hiba kombersashon ku otro. Di e forma akí koleganan a stimulá otro pa laga hasi e saminashon preventivo.

2 aña pasá Rotary a hasi donashon di e aparato di mamografia 3D na FP. Rotary ta keda enbolbí den e forma di kuido di salú akí i ta sostené FP pa nan por alkansá nan metanan. Fundashon Prevenshon lo por midi efekto di e kampaña mas lat den e aña akí, pero ta di opinion kaba ku nan a logra nan meta. Aktualmente ainda por mira e imáhennan di e kampaña riba diferente billboard. Esaki lo keda asina te ora surgi otro partido ku ke pone nan propaganda riba billboard.