Willemstad – Curaçao Footprint Foundation huntu ku Grupo Biná ta organisá riba dia di San Valentin un kaminata den e área di naturalesa di Watamula djasabra 14 di febrúari parti mainta. Bin disfrutá di naturalesa I e lus di solo mainta trempan riba e dia speshal aki. E kaminata ta kuminsá 07.00 or di mainta i e grupo lo reuní for di 06.45 or di mainta riba e lugá di parker na otro banda di misa di Westpunt. E kaminata aki ta kuminsá dilanti di e misa di Westpunt I lo bai promé den direkshon di Watamula, un área sumamente bunita. For di aki e gruponan lo kana bai den direkshon di Dos Boka kaminda lo tuma un deskanso chikitu pa disfrutá di e paisahe I kosta nòrt. Despues lo kana drente e serunan patras pa terminá bèk kaminda a kuminsá. E ruta lo tuma 3 ora i mei i e gastu ta 20 florin pa persona ku ta inkluí un kos di bebe, fruta fresku i ob. Ta importante pa bisti sapatu pa kana fuerte, un pèchi i bin ku awa adishonal pa bebe durante e kaminate I tambe krema pa evitá kimá di solo. E kaminata ta riba propio riesgo. Nos ta kana ku grupo chikitu i pa e motibu aki inskripshon ta nesesario. Por inskribí dor di yena e formulario di inskripshon riba e website www.curacaofootprint.org of dor di manda un mail pa info@curacaofootprint.org.