Willemstad – Curaçao Footprint Foundation huntu ku Grupo Biná ta organisá riba dia 11 di aprel un kaminata den e área di naturalesa di Pannekoek parti mainta. Bin disfrutá di naturalesa I e lus di solo mainta trempan riba e dia aki. E kaminata ta kuminsá 07.00 or di mainta i e grupo lo reuní for di 06.45 or di mainta riba e lugá di parker dilanti Landhuis Pannekoek.

Nos ta kana den un roi hundu, pasa e ‘manzaliña bos’ pa asina yega na e saliña di San Juan. E kaminda ta smal i ta terminá na un playa di piedra di koral ku ta ofresé un bunita bista riba kosta. E kaminda pa bai bèk lo subi diferente seru ku ta duna un bista riba e paisahe di Bandabou.

E ruta lo tuma 3 ora i mei i e gastu ta 20 florin pa persona ku ta inkluí un kos di bebe, fruta fresku i ob. Ta importante pa bisti sapatu pa kana fuerte, un pèchi i bin ku awa adishonal pa bebe durante e kaminate I tambe krema pa evitá kimá di solo. E kaminata ta riba propio riesgo.

Nos ta kana ku grupo chikitu i pa e motibu aki inskripshon ta nesesario. Por inskribí dor di yena e formulario di inskripshon riba e website www.curacaofootprint.org of dor di manda un mail pa info@curacaofootprint.org.