Djaweps dia 1 di òktober último, durante un reunion èkstra ordinario di e organisashon, a tuma lugá kambio di presidensia di direktiva di Stichting Prinses Wilhelmina Fonds. Despues di a okupá e funshon aki pa kasi 10 aña señora Yvonne Verbrugge-Neuman ta pasa e puesto di presidensia ofer pa señora mr. Alba Martijn. Señora mr. Alba Martijn no ta un deskonosí pa nos ningun. Anteriormente e tabata okupá e funshon di Ombudsman (Defensor di Pueblo) den nos komunidat.

Na e okashon aki señora Martijn a presentá su plan di maneho na su koleganan miembro di Direktiva, pa despues di e reunion èkstra ordinario aki sigui ku e parti di  e instalashon ofisial,ku a tuma lugá den e patio di Prinses Wilhelmina Fonds situá na Scharlooweg 52. Durante e akto ofishal tabatin un kantidat grandi e invitado entre kua S.E. Gobernadó di Kòrsou, señora Lucille George-Wout huntu ku su esposo señor Herman George, kendenan qualitate qua ta Protektor i Presidente di Honor di e Stichting Prinses Wilhelmina Fonds.

Tambe un kantidat grandi di amigu di e organisashon a hasi akto di presensia entre kua trahadónan, boluntario i klientenan di Prinses Wilhelmina Fonds, diferente spònser i otro invitadonan, ku semper ta para kla pa Prinses Wilhelmina Fonds, ku tambe a bin despedí di señora Yvonne Verbrugge-Neuman i alabes duna un bon biní na e presidente nobo señora mr. Alba Martijn.