Komunidat di Kòrsou durante ultimo 1 aña i 7 luna por a disfrutá di notisia lokal i internashonal, tantu riba telefòn komo riba e página i wèpsait di LOOP.

Den un tempu rèkòrt LOOP a alkansá un oudiensha grandi den komunidat di Kòrsou, Aruba, Boneiru, pero tambe na Ulanda i otro partinan di mundu. LOOP ta un aplikashon i wèpsait ku ta konosí no solamente na islanan ABC, pero tambe na Jamaica, Trinidad, Haiti, Sürnam, Barbados, Cayman Islands i St. Lucia.

Un tim dediká i ku hopi pashon a traha di forma inkansabel na Kòrsou i Aruba, p’asina brinda usuarionan di LOOP notisianan di momento, pero alabes informashon i tepnan balioso, kon pa entre otro adaptá na un estilo ku ta mehorá nos kalidat di bida diario.

Direkshon di Trend Media resiéntemente a realisá un revishon pa loke ta progreso di LOOP en general. Despues di un revishon profundo, a yega na e desishon pa konsentrá tur trabou i publikashon, via di sinku sentro di servisio.

Kòrsou lamentabelmente no a kai bou di e sinku sentronan di servisio, motibu pa kual entrante dia 1 di aprel ultimo, tur notisia i publikashon riba e app i wèpsait ta bai via di e sentro na Trinidad. Konsekuentemente, tur notisia i publikashon riba e aplikashon di telefòn i wèpsait pa islanan ABC, lo bai ta na idioma ingles.

E tim di LOOP ABC kier hasi uso dje oportunidat pa gradisí e oudiensha ku durante 1 aña i 7 luna a sa di sostené LOOP ABC. E tim di LOOP ABC ta spera sinseramente di por sigui sirbi i konta ku e mesun sosten i konfiansa di komunidat di Kòrsou den kualkier otro forma den futuro.

Un biaha mas, un danki di kurason di parti e tim kompleto di LOOP ABC.