WILLEMSTAD —  Despues ku siman pasa, un públiko grandi a disfrutá inmensamente di e show musikal ku Reinier Lijfrock i Jennifer Grant a trese, e siman aki, Freewinds ta sigui ku su konsiertonan grátis. E siman aki lo presentá e konosido Kadir Snijder, Jennifer Grant i lo hasi su debut riba Freewinds, e hóben kantante David Hugo.

Kadir Snijder

Kadir no ta un kantante deskonosí aki na Kòrsou. Ku su  tremendo bos báritòn, Kadir lo bai entretené e públiko ku kompañamentu di The Freewinds Band.

Na vários okashon den pasado, Kadir a yega di presentá riba Freewinds ku hopi éksito. E biaha aki, un biaha mas Kadir lo bai tei pa asina ei kanta pa su pueblo.

Jennifer Grant

Jenny ku tabata tei siman pasa lo ripití e siman aki. Esnan ku tabata tei siman pasa djamars por a disfrutá enormemente di e tremendo i potente bos di Jennifer Grant.

Siman pasa Jenny a laga tur hende ku gana pa mas i esei nan lo haña djamars awor ora ku JG lo presentá un biaha mas riba Freewinds ku kompañamentu di e tremendo band musikal di e barku.

David Hugo

David Hugo ta un hóben kantante ku aparte di ta un tremendo jinete di kabai di paso fino, tin un talento formidabel den kanto. Ku un stèm tenor fuerte, e hóben aki djamars awor lo bai duna tur ku tin pa asina ei  demostrá esnan presente su kalidat di kanto ku tas úniko.

 

The Freewinds Band i NGN Brazz

Ta bon pa menshoná, ku durante de presentashon di djamars awor, lo tin kompañamentu musical di The Freewinds band enkabesá pa e gran músiko I guitarista Patrick Zaguray I tambe e otro músikonan talentoso di e tremendo banda aki. Tambe lo tei presente den  NGN Brazz ku ta ser forma pa Norman Kooks ( trompèt), Giovanni Atalita ( trombon) i tambe Norbert Girigorie ( sax)  pa hasi e totalidat pa loke ta trata e kompañamentu musikal.

Entrada grátis

Manera a bira kustumber, entrada pa e konsierto nan ku Freewinds mes ta organisá ta grátis. E show ta kuminsá eksaktamente 8 pm i p’esei nos ta pidi tur hende pa nan tei for di 7:30 pa asina ei nan por subi i presensiá un tremendo show.

Ku tur probabilidat Freewinds djamars awor dia 18 di yüli lo tan a mará na Mathey Werf ku ta keda nèt dilanti di  Luna Blou. Pa bo  keda registrá pa un o mas asiento den e show aki, manda un app na  +59995130837  i bisa kuantu lugá bo tin mester. Tur esnan ku den pasado a yega di bai e shownan riba Freewinds sa kon bon e ambiente aki sa ta.

Atentamente