WILLEMSTAD – Junior Tecla tei bèk i a disidí di korona su regreso, ku un single nobo titula ‘Ta Ken Bo Ta’. E single aki ta anunsia un proyekto nobo, unda e ta trese heroenan manera Doble RR i Chin Behilia huntu ku artistanan ku awó ta lanta den genero urbano.

“Ta Ken Bo Ta’ a keda produsi pa Url Isenia i Tyzik ‘Ziko’ Lispier, i a keda skibi pa Tecla i Zoinx. E talentoso vokalista Niata Augusta a añadí su toke kultural ku a kompletá e komposishon.

E single aki ta un anunsio pa un proyekto di interkambio musikal titula ‘Urban ta topa ku grandinan legendario’, unda Tecla ke refreska kantikanan di aña 80 bai abou, pues e era di Ritmo Kombina. Aki Tecla ke krea un sosiedat di outor unda e ta trese talentonan nobo di e generashon aktual i laga nan será konosí ku e artistanan legendario ku ainda ta na bida. VibeNation Tres aña pasa, Tecla a forma VibeNation, un banda estelar ku ta akompañá diferente artista lokal i internashonal. Huntu ku Vibe Nation, Tecla a presenta den festivalnan grandi manera Velas Latinas i tambe huntu ku Izaline Calister i Oscar de León. Resientemente Tecla i VibeNation a presenta na Bonaire Beach Festival huntu Ku Barry Hay i Jeon. Tambe VibeNation a presenta tambe na e eksitante festival di bario Kaya Kaya den Otrobanda.

E banda ta konsistí di e siguiente integrantenan, e talentoso vokalista Jasmin van Eeden, kende a lanta den un famia musikal (Douglas twins), i rapper Zoinx, un maestro lingüístiko ekstraordinario kende ta krea tekstonan ku tremendo kontenido. Zoinx tin un hugada di palabra interesante i ta un artista di pura sepa. Elbert Jozefa, produktor di entre otro Aemy Nia Feliz, ta un multi instrumentalista, meskos ku e mayoría talentonan den e VibeNation. Royston Hato ta riba drums i tambe sostene vokalmente. Willem Blankenburg ta un guitarista di alta nivel, pero tambe e ta rekonose komo kompositor di músika pop na Kòrsou. E ta outor di diferente hit manera ‘Chillen op de Antillen’.

VibeNation ta keda renforsa pa produktornan Tyzik Lipsier (Nastyplay) i Oscar Bor, ku tambe ta ingeniero di sonido di Randall Corsen i Izaline Calister. Tambe Bor ta produktor kolaborando di entre otro Kuenta i Tambú, Levi Silvanie i Junior Tecla.

Por pidi pa “Ta Ken Bo Ta’ na tur radio emisora popular riba nos isla. Pa mas informashon chek e Facebook di Tecla na www.facebook.com/JrTecla of Vibenation na www.facebook.com/VibeNationCuracao