Hemingway un biaha mas e sitio pa

Djasabra 3 di òktober, Hemingway Beach, Bar and Restaurant un biaha mas ta esenario kaminda músika di e legendario artista Hamaikino Bob Marley lo ta sentral. Riba e anochi ei, Junior Tecla lo presentá ku su banda The Rootsriders ku ta bini direktamente for di Amsterdam.

Ta konosí ku presentashonnan anterior tabata un gran éksito i e show na òktober próksimo tambe ta pinta di bira unu espektakular. The Rootsriders ta ser konsiderá un di e mihó bandanan ‘Tribute to Bob Marley’ na mundu. I ku nos yu’i Kòrsou Junior Tecla komo kantante prinsipal, e éksito di e banda ta kresiendo ketu bai.

Na aprel último Junior a kuminsá un gira ku Rootsriders na Oropa ku a terminá al rededor di 11 di mei ku ta e fecha riba kua Bob Marley a fayesé. Junior ta konta:“Tur nos presentashonnan tabata ‘sold out’. Kada bes di nobo tabata un gran emoshon pa mira míles di amante di Reggae kanta kantikanan di Bob Marley huntu ku  nos.” Junior ta sigui bisa ku e ke pa fanátikonan na Kòrsou tambe eksperenshá e ambiente speshal ei.

E promé biaha ku e públiko di Kòrsou por a gosa di e konsierto di Junior Tecla i The Rootsriders tabata na 2012 na Zanzibar. E aña siguiente nan tabatin un presentashon na Hemingway i na 2014 tambe por a mira nan durante di e Reggae Festival na Landhuis Brievengat.

E biaha aki atrobe Hemingway  Beach, Bar and Restaurant a keda elegí komo lokalidat pa e ‘Bob Marley Tribute’. Di akuerdo ku Marijn de Haan ku ta kordinadó di e evento, e ‘beach’ i e ambiente di Hemingway ta pas perfektamente pa un konsierto di  Reggae. “Mirando e ambiente na Hemingway i e talento di e miembronan di e banda, mi ta sigur ku e edishon aki di Junior Tecla i The Rootsriders tambe lo bai ta ‘sold out’” De Haan ta bisa.

Benta di karchi di entrada ta kuminsá djaweps 17 di sèptèmber. Por kumpra  karchi na rason di Nafl. 25,- na Mensing’s Caminada, Albert Heijn, Bruna, Beep Beep, Van den Tweel, Hemingway, Pleincafe Wilhelmina i online via www.ticketscaribbean.com. Na porta karchi ta kosta Nafl. 29,-.