…antisipando gran festival di CNSJ …
WILLEMSTAD – Djasabra awó ta tuma lugá e Curaçao North Sea JAMZZ. Den antisipashon pa e próksimo Curaçao North Sea Jazz Festival, Renaissance Curaçao Resort ta introdusí e promé edishon di un atardi grátis yená ku presentashon di artistanan lokal, regional i internashonal. E idea ta pa netamente añadí espektativa na e festival di mas grandi riba nos isla. Djasabra awó por konta tambe ku presentashon di Junior Tecla un yu di Kòrsou ku a duna presentashon rònt Europa i ta hopi popular pa su presentashonnan i estilo úniko. Konosí pa piesanan manera e.o “Fresh”, “Kuid’é Flor”,“Aurora ta Yora” i “Ban sende luz”
Junior Tecla nasé na Kòrsou ku popularidat internashonal. Awendia konosí pa su dreadlocksnan i personifikashon práktikamente idéntiko na Bob Marley, tantu den bos i estilo di músika. E ta ‘karga’ su ‘locksnan’ komo símbolo di ta un abogado (sòldá) di pas. Na edat di 27, e’la haña e ‘yamada’ di bira músiko; su promé agrupashon musikal tabata ‘The Juize’ i a konta ku partisipashon di otro artistanan manera Giovanca Ostiana. Pronto, Tecla a realisá ku ‘soul’ no tabata su ‘kos’ i a sigui riba e trayekto pa enkontrá su propósito real. Aki ta na unda, ku despues di a presentá algun bes pa siman na Istanbul i Bodrum, e’la regresá Amsterdam pa duna un presentashon ku si lo a yena su kurason, “Tribute to Bob Marley”- su artista faborito. Despues di hopi reakshon e banda e risibí un oferta pa ‘tour’ ku e “Tribute to Bob Marley”- nan a realisá 3 ‘tour’ rònt Europa, The Caribbean, America i Africa. Awòki, Junior Tecla ta presentá ku su banda ‘Turtuga’ den kual e ta produsí su propio músika inspirá pa gruponan manera The Jazz Cats. Junior Tecla i Turtuga ta presentá nan propio género yama Curapop”, kual nan ta deskribí komo músika ‘pòp’ ku ritmonan afrokaribense. (fuente: Skempi)
Riba dia 29 di ougùstùs próksimo Kòrsou por disfrutá di presentashon di Junior Tecla durante di e promé edishon di Curaçao North Sea JAMZZ. Tambe lo tin presentashon di DJ Lu-C, DJ Paco, DJ Ro-1, Gino & Co., Gilmar Fraites, Hershel Rosario & Co., Perfect Fourth, Tumabo Curaçao, KY3 for di Venezuela i Maite Hontelé for di Europa. Lo tin presentashonnan entre 4:30PM i 12:30AM. Entrada ta grátis.