Den un konsierto pa pueblo di Kòrsou

WILLEMSTAD —  Djamars awor dia 11 di ougùstùs, lo tin un konsierto grátis  riba Freewinds, espesialmente pa pueblo di Kòrsou. Manera ta konosí, tur biaha ku Freewinds ta den Haf na Kòrsou, nan tin un konsierto, sea grátis o pa rekoudá fondo pa un o kualkier organisashon.

Djamars awor lo mester tabata tin un aktividat, pero esaki no ta bai dor mas i for di Freewinds a bini e petishon pa nan por organisá un aktividat o sea un otro konsierto grátis pa Pueblo di Kòrsou. E dos main kantantenan pa e djamars aki ta Julius Andrew i tambe Debbie Beaujon.

Julius Andrew

Ta trata aki di dos kantante ku no mester di ningun tiki introdukshon aki na Kòrsou. Julius Andrew ta un kantante lokal ku a hasi su karera na Boneiru, pero entre tantu e ta bek aki na Kòrsou.

E tabata konosí pa su bunita rancheranan, pero tambe último aki el a uni ku e kompositor lokal Ike Jesusrun i a traha riba kansionnan sumamente bunita mes.

No mas ku dos siman pasa den e konsierto kaminda e feature Toni Worrel, Julius Andrew a kanta dos kansion ku a laga e públiko enkantá.

Debbie Beaujon

Esaki ta otro kantante lokal ku ta un  regular riba Freewinds. Debbie ta un kantante ku internashonalmente a marka su pouta i no papia mes  di su presentashonnan ku The Freewinds Band.  Debbie ta un tremendo kantante lokal ku tin e arte di kanto bon dominá i a bisa ku djamars awor e lo duna tur ku tin pa pueblo di Kòrsou.

YAMA PA REGISTRA SI TABAI

Meskos ku biaha pasa, e biaha aki tambe mester yama 6613227 pa asina ei tur hende ku ta  deseá pa wak e show aki registrá nan mes. E asientonan ta limitá p’esei nos ta pidi tur hende pa yama i konfirmá ku nan ta bai.  E fórmula aki a kana masha masha bon mes último biaha.

Pues te djamars awor riba Freewinds den un tremendo show grátis ku Julius Andrew  i Debbie Beaujon i The Freewinds Band.