WILLEMSTAD – E hoben prospekto, Jonathan Willems a hasi un bunita gesto ku skol di fundeshi Cola Debrot situá na Noord Roozendaal. Jonathan Willems for di aña 2015 a firma komo agente liber i ta pertenesé na e tim di Cincinatti Reds Greeneville. Despues di un temporada ku a bai hopi bon pa Jonathan den 2018 aki, e ta na Kòrsou pa gosa di fakansi. Semper ku Jonathan ta na Kòrsou, e ta un hoben ku kier duna komunidat algu bèk. Den kuadro di esaki, Jonathan Willems a skohé na e okashon aki, pa sorprendé 65 mucha di Kolegio Cola Debrot na Noord Roozendaal ku un desayuno. Na momentu ku Jonathan Willems kompañá pa su mayornan i tambe demas famia a yega na e skol, e muchanan tabata hopi kontentu ku e gesto aki. Tur mucha a risibí un desayuno komo regalo ku entre otro pandushi, fruta, djus, bolo, buskuchi, chips pero tambe un tas, ku nan por siguí usa pa ora nan mester hasi deporte na skol. Tur 65 mucha huntu ku e hoben pelotero a sinta bou di palu na Kolegio Cola Debrot pa disfrutá di e regalo. Na final di e mainta, Jonathan a regalá tambe 3 mucha na e skol, bala i tambe bate, pa nan tambe por ta un mini-pelotero.  Kolegio Cola Debrot ta e skol ku Jonathan mes a bishitá komo mucha i a inisiá ku su karera di edukashon na dje. I ta pesey e kier a bai bèk na su skol i hasi e gesto aki ku tur e muchanan.