Den un ambiente di nostalgia y orguyo

ORANJESTAD, Aruba –November 2015: Despues di lunanan di preparacion, canando paralelo cu trabounan di renobacion y construccion, diabierna 7:00pm a tuma luga apertura oficial di Joe Laveist Sport Park. Cu picheo di Minister Mike de Meza y bateo di Minister Alex Schwengle, a inicia e evento cu a conta cu tribunanan completamente yen! E eventonan no tabata solamente riba diabierna, sino a sigui diasabra y diadomingo tambe.

Diabierna dia 27 di november pa 6or di atardi ta tuma luga e apertura oficial di e facilidadnan, den cual a honra esunnan cu a sostene e sport park y grandinan den e mundo di deporte.

E prome wega di baseball tabata entre Wild Cats di Corsou y e All Star Team di Aruba, mientras cu den Beach Volleyball tabatin 3 team masculino cu a midi forsa cu e atletanan di Aruba. Tambe tabatin algun pelea di Boxeo.

Ta yama un danki special pa e presentacion espectacular di e gruponan di baile di Freddy Montoya y Freddy Tromp di Popcorn Dancers. Tambe a devela e “Wall fo Fame” cu e prome set di mas di 300 nomber di beisbolistanan cu a hunga den Joe Laveist Sport Park den nan bida.

Joe Laveist Sport Park tin luznan nobo, tribuna y daknan di tribuna nobo, un score board moderno cu ta traha cu “remote control”, facilidadnan pa reporteronan transmiti wega, un veld completamente renoba y un “zandbak” pa haci e deportenan di beach, manera beach volleyball. E di tres fase di e renobacion y expansion di Joe Laveist Sport Park ta encera construccion di dos sala grandi pa “indoor sports facilities”, manera taekwondo, basketball, karate, boxeo, etc.