Skirbi pa Clyde Harms
Dia 27 di november lo tin e gran re-apertura di Joe Laveist Sportpark. En preparacion pa e evento aki, e comishon di re-apertura a yama veteranonan di baseball pa un encuentro pa nan por recorda nan tempo di gloria, mira e facilidadnan nobo y wordo entrevista pa Srta. Cherryldine Buckley pa un programa di TV despues. Diasabra atardi como binti veterano cu a yega di hunga riba e park aki a responde na e invitacion cu nan prersencia. Cu hopi nostalgia mi tabata corda e temponan cu mi tabata jong y participa den campeonatonan na loke e tempo ainda tabata yama Lago Sport Park. Un tristeza tabata drenta mi ora cu nos tabata conta anecdotanan di e weganan di nos tempo y nos tabata menciona hendenan cu a bay laga nos. Mi mester confesa cu e unico biaha cu mi a bishita e parke aki desde cu el a haya e nomber di Joe Laveist Sportpark, tabata na 2003 cu ABBA a organiza un torneo internacional na honor di Efraim “Boei” Brion, Don Juan Perez y ami como e escritornan di e buki “Historia di Baseballl di Aruba – e prome añanan”. Ki diferencia cu 12 aña ta haci! Cu e restauracion, Joe Laveist Sport Park a bira un joya na San Nicolas. En bes di tera , yerba artificial ta cubri henter e tereno cu excepcion di e pasiyonan entre e basenan. E outfield ta circular locual ta haci cu e distancia di homeplate pa fin di centerfield ta mescos cu esun di right field y left field. Joe Laveist Sportpark tin un diamante di baseball di berdad mescos cu e stadionnan di liganan grandi y tin un monticulo pa e pitcher. Esaki a haci mi corda e tempo cu nos a bay Havana cu e prome ekipo di Aruba cu a tuma parti den un Serie Mundial di Baseball Amateur. Nos pitchernan cu nunca tabatin mas cu un repi di rubber pa para ariba, mester a custumbra di pitch for di un monticulo casi 40 cm haltu.
Mi tin e privilegio di a conoce Joe Laveist personalmente. Por cierto, el a hunga su dos añanan final den baseball den e mes teamnan cu mi: 1950-51 den Pepsi Cola y 1951-1952 den Nesbitt’s. Su nomber oficial ta Valentin Laveist, pero e tabata conoci como “Joe di Maggio” pa su bateo, posiblemente tambe pa su comportacion di cabayero riba tereno y afor di tereno, pasobra e tempo ey e strea di New York Yankees tabata venera pa su cabayerismo. Cu tempo e dos nombernan a converga y awor Aruba ta recorda e cabayero como Joe Laveist. Den mi buki di historia di baseball “Joe di Maggio” Laveist ta aparece pa di prome biaha como hungador di Esso Garage, un di e potencianan beisbolistico di 1943. E ultimo uniform cu Joe a bisti tabata di Nesbitt’s na aña 1952. Durante e nuebe añanan entre e dos fechanan, mi por a constata cu Joe a hunga cu Antraco na 1946-7, cu Coca Cola na 1948-9 y Pepsi Cola na 1950-51. Mi tin un sospecho grandi cu durante e añanan 1944 y 1945 tambe Joe a participa den e campeonatonan di baseball na San Nicolas pero mi no a haya documentacion pa confirma mi sospecho. Veteranonan cu a hunga tempo cu Joe Laveist tabata hoben ta record’e como un “hustler” cu tabata duna animo na su compañenan di ekipo. Durante su ultimo añanan, tempo cu mi tabata su compañero di ekipo, ainda Joe tabata un “hustler” y e tabata dispuesto pa comparti su conocemento di e deporte cu nos tur cu tabata cuminsando.
Tempo cu Joe tabata encarga cu mantenshon di e sportpark tur cu tabata haci uzo di e luga tabata stim’e. No ta sorprende mi. Joe Laveist cu su encanto tabata captiva cariño di tur cu a conoce. Merecidamente, Joe Laveist a ricibi e honor di haya e sportpark nombra pe. El a merec’e! El a merec’e riba tereno di baseball pa su fieldeo, su bateo y pa su deportivismo pa hopi aña. El a merece pa su cabayerismo for di tereno. El a merece como encargado di e facilidad y e manera cu e tabata trata tur hende cu tabata uza e sportpark y su ekiponan.