Durante evento di CHTA na Puerto Rico

ORANJESTAD, Aruba – 3 di october 2016: Tabata diadomingo 2 di october ultimo ora cu Caribbean Hotel and Tourism Association (CHTA) a tene nan ceremonia anual di premiacion den El Conquistador Resort na Puerto Rico. Durante e evento aki, cu ta forma parti di e Caribbean Hospitality and Industry Exhange Forum (CHIEF) ta premia talentonan cu ta resalta den e industria. Ta cu masha orguyo, Jim Hepple, como e Chief Executive Officer (CEO) y alabes Presidente di Aruba Hotel and Tourism Association (AHATA) a ricibi e premio como e “2016 Caribbean Hotel Association Executive of the Year”!

Jim Hepple ta den e funcion di CEO na AHATA desde aña 2009 y tambe ta den e hunta di directiva di CHTA desde aña 2012. E ehecutivo na cabes di e asociacion di turismo di Aruba a expresa cu el a keda sorprendi cu e premio, pero ta cu masha placer e ta ricibi’e.

“Tin mas di 30 otro ehecutivonan den asociacionnan di hotel den e region cu tambe ta haciendo un trabou excelente den representa interes di nan miembronan. Ta cu e realidad ey den mente ta un honor grandi pa mi wordo reconoci dor di mi compañeronan”, asina Jim Hepple a duna di conoce cu un sonrisa riba su cara di alegria.

Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.