JetBlue ku oumento di buelo pa Kòrsou for di New York
WILLEMSTAD – 27 desèmber, 2022 – Ofisina di Turismo di Kòrsou (CTB) ta anunsiá ku entrante 6 di aprel 2023, JetBlue lo agregá dos buelo adishonal for di John F. Kennedy International Airport, oumentando asina su buelo nòn-stòp di tres dia pa siman na sinku dia pa siman. E servisio adishonal ta bini komo resultado di un demanda kresiente for di e merkado merikano i tambe e kolaborashon duradero ku tin entre JetBlue i stakeholders lokal manera Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA).
Ku e oumento di kantidat di buelo, rutanan ida i buèlta lo bai ta disponibel riba djaluna, djaweps, djabièrnè, djasabra i djadumingu. Buelonan lo sali for di New York (JFK) 8’or di mainta i yega Kòrsou pa 1:25 mèrdia, ku un buelo di regreso for di Kòrsou pa JFK saliendo 2:25 p.m. i yegando 6:29 p.m. Di akuerdo ku Minister di Desaroyo Ekonómiko, Ruisandro Cijntje, “Esaki ta un logro hopi importante pa den 2023 sigui engrandesé nos turismo i konsekuentemente duna un impulso na nos ekonomia. E buelonan adishonal akí lo kontribuí na krese e merkado merikano mas ainda despues di un tremendo aña 2022”.
Den e último aña akí, Kòrsou a eksperensiá un demanda kresiente for di Merka, i e momentum ta kontinuá ku un oumento proyektá di 20% pa loke ta trata bishitantenan for di Merka na 2023 kompará ku 2022. E oumento akí ta debí pa gran parti na apertura di diferente resort nobo, huntu ku rebranding i renobashon di resortnan eksistente na Kòrsou. E oumento den desaroyo di diferente propiedat, ku respaldo di markanan prinsipal den mundu di hospitalidat riba nivel mundial, a yuda pa nos isla bira mas konosí i e oumento di buelo di JetBlue sigur lo yuda pa kumpli ku e demanda aki.
Aña 2022 tabata un aña ku a kibra rèkòrt. For di òktober, e kantidat total di bishitante for di Merka a surpasá nos metanan, alkansando 122% di e kantidat di bishitantenan proyektá for di e merkado merikano, i nos tin konfiansa ku e aña benidero lo sigui riba e mesun rumbo.
CTB ta ansioso pa risibí bishitantenan nobo i pa kompartí e bunitesa di nos pais.