Despues di un eksitoso promé edishon di JCI Willemstad su evento pa rekoudá fondo titulá “Funchi Ku” aña pasa na Museo di Kòrsou, e aña aki atrobe JCI Willemstad ta organisá e evento aki. “Funchi Ku” ta un gala kultural kaminda funchi lo ta e ingrediente prinsipal, sirbí den diferente kombinashonnan.
E aña aki “Funchi Ku” lo tuma lugá djasabra 28 di novèmber 2015 di 6:00pm pa 11.00pm na Gròt di Hato. “Funchi Ku” ta kombiná komementu i bailamentu den un esfera kultural. Riba e anochi aki lo bo por disfrutá di funchi na diferente manera prepará o kombiná ku platonan delisioso i algun nunka bisto promé.
Una bes bo tin bo karchi di entrada, bo por disfrutá kuantu ku bo ke di tur e platonan ku lo bai tin riba e anochi aki. Lo tin funchi ku por lo ménos 18 kombinashon pa bo saboriá. Pa menshoná algun: stoba, sòpi marisko i funchi fries. Tur plato lo keda presentá na un manera elegante, uniko i diferente. Lo bai tin pasabokanan ku tambe lo ta traha di “funchi”. Tambe lo bo haña 1 “welcome drink” i 2 bebida (di bo eskoho). Músika no por keda afó i pa mantené e esfera kultural, esaki lo ta na enkargo di Curaçao Steelband, Grupo Konchemba i Dolce Band.
JCI Willemstad ta invitá amante nan di dushi kuminda kombiná ku bon músika pa bin purba e konsepto úniko aki i koperá di e forma aki ku nos organisashon. Pasa awe mes na “Mensing’s Caminada” òf “24 uur uit de muur” i kumpra bo karchi ku tin un balor figurativo di 100 florin i bin gosa ku nos dia 28 di novèmber próksimo, na Gròt di Hato na “FUNCHI KU…”
JCI Willemstad
JCI Willemstad ta un organisashon ‘non-profit’ ku ta enfoká riba liderazgo i formashon di hóbennan entre 18 i 40 aña. E mishon di JCI ta pa kontribuí na desaroyo global di nos komunidat dunando hóbennan e oportunidat pa desaroyá nan abilidat di liderazgo i responsabilidat sosial nesesario pa asina krea kambionan positivo.