Willemstad, 31 di mart 2015 – Pa por yega na fondonan pa sigui traha pa nos dushi isla i organisá proyektonan pa hasi kambio positivo den nos komunidat, JCI IOBA Curaçao ta organisando un Seminario di Liderasgo titulá: ‘Wake Up and Break the Box!’. Orador pa e seminario aki ta señor Patrick Knight direktamente for di Merka. Sr. Knight ta un abogado, eskritor i alabes un ‘trainer’ sertifiká internashonalmente den e ‘JCI Training Institute’ ku eksperensia riba tereno di komersio i negoshi, maneho i komunikashon. E seminario lo tuma lugá riba djabièrnè 8 di mei 2015 di 8or di mainta pa 12or di mèrdia na Santa Barbara Beach & Golf Resort. Pa solamente USD 149,00 partisipantenan por eksperensiá un seminario interaktivo na nivel internashonal, siñando kon pa deshasí di patronchinan bieu di pensa, poniendo atenshon riba ‘é loke ta posibel’ sea den bida personal òf karera profeshonal. Tambe partisipantenan ta bai diskubrí maneranan nobo pa pensa kreativo i solushoná problemanan. ‘Why think outside of the box if you can completely break the box?’ JCI IOBA (Involvement of Banda Ariba) Curaçao ta un organisashon lokal ku ta afiliá na Junior Chamber International (JCI). JCI ta e federashon mundial di lidernan entre 18 pa 40 aña ku ta dediká na trese kambio positivo den nos komunidat. Alabes e miembronan ta kompartí konosementu ku otro, mientras kada ken ta traha riba su kresementu personal. E Seminario di Liderasgo aki ta un di e aktividatnan ku JCI IOBA Curaçao lo organisá pa ‘Lead from Within’ i selebrá 100 aniversario di JCI durante 2015. Pa más informashon i/òf registrashon por bishitá e wèpsait www.jci.cc/local/ioba òf e página di Facebook: JCI IOBA Curaçao.