Willemstad – Dia 16 di mei último JCI IOBA Curaçao i Banco di Caribe a tene un eksitoso dia di training den kuadro di e proyekto Creative Young Entrepreneur Award (CYEA). E dia di training ta tin komo meta prinsipal pa ofresé e hóbennan empresario e instrumentonan nesesario pa por sigui krese.

Pa di shete aña konsekutivo JCI IOBA Curaçao huntu ku Banco di Caribe ta organisá The Creative Young Entrepreneur Award (CYEA). CYEA ta rekonosé, honra i selebrá empresarionan eksepshonal, i e ròl di kreatividat den nan éksito. E tema di CYEA e aña aki ta ‘’Crafting your Business’’. E programa lo yuda empresarionan hóben i tambe hóbennan en general ku ta aspirá pa bira empresario identifiká i uza elementonan esensial pa tin un negoshi ku ekselensia duradero. Komo parti di e proyekto a tene un dia di training djasabra 16 di mei último. E oradornan tabata  Steven Damiana di Kamer van Koophandel, Chey Bottse di Banco di Caribe, Ryan Ranes di  Infotrans, Ricardo Lochan di Curaçao Innovation & Technology Institute, Bryan Palm huntu ku Tini Samsom di ENNIA i tambe  Ulvrin Sprott huntu ku Mariela Burk di Severus. Esaki tabata un chèns úniko pa empresarionan hóben haña konosementu práktiko i balioso pa yega na un empresa duradero.

E kompetensia pa Creative Young Entrepreneur Award tambe a kuminsá kaba. E aña aki tambe Banco di Caribe ta pone, komo patrosinadó prinsipal, un premio di NAF 10.000 pa e ganadó di CYEA. Ademas di tur esaki, e aña aki lo introdusí un kategoria nobo spesial pa e hóbennan ku ta aspirá pa bira empresario, the Aspring Young Entrepreneur Award (ACYEA). Interesadonan ta wòrdu invitá pa akudí na e anochi di informashon i registrashon djaluna 25 di mei próksimo entre 18:30 i 19:30 na Training Center Banco di Caribe. Pa mas informashon tokante CYEA 2015 bishita www.iobacyea.com òf e página di facebook di JCI IOBA Curaçao.