Willemstad – Pronto e kompetensia pa saka e empresario hóben di mas kreativo di Kòrsou ta tuma lugá. Esaki ta di shete biaha ku JCI IOBA Curaçao i Banco di Caribe ta organisá e proyekto eksitoso “The Creative Young Entrepreneur Award” ku tin komo meta stimulá hóbennan pa bira empresario. Inskripshon ya a habri pa e kompetensia aki.

Tur aña JCI IOBA (Involvement of Banda Ariba) Curaçao ta organisá e proyekto aki. JCI IOBA Curaçao ta un organisashon lokal ku ta afiliá na Junior Chamber International (JCI). JCI ta e federashon mundial di lidernan entre e edat di 18 pa 40 aña ku ta dediká na trese kambio positivo den nos komunidat.

Meta di e proyekto CYEA ta pa rekonosé i honrá ekselensia di empresarionan na Kòrsou. Pa medio di e proyekto aki e ròl di kreatividat den nan forma di produsí òf duna servisio ta keda enfatisá. Tambe JCI IOBA Curaçao ke stimulá hóbennan den nos komunidat pa bira empresario.

Esaki ta di shete okashon ku JCI IOBA Curaçao ta organisá e proyekto aki. Meskos ku tabata e kaso den e edishonnan anterior, Banco di Caribe komo patrosinador prinsipal, ta buta un promé premio di NAf. 10,000 disponibel pa e ganador di e kompetensia di CYEA. E ganador por usa e premio aki pa invershon den su empresa.

P’esey JCI IOBA Curaçao i Banco di Caribe ta buskando e empresario yòn i kreativo ku a kuminsá un negoshi nobo òf a krea kambio positivo den un negoshi eksistente desaroyando un produkto of servisio nobo, introdusiendo kambio den proseso di negoshi, merkadeo, òf solushonando un problema di un forma kreativo.

E tema di CYEA e aña aki ta ‘’Crafting your Business’’. E programa lo yuda empresarionan hóben i tambe hóbennan en general ku ta aspirá pa bira empresario identifiká i uza elementonan esensial pa nan tin un negoshi di ekselensia duradero. E meta prinsipal ta pa ofresé e empresarionan i esnan ku ta aspirá pa bira empresario e instrumentonan nesesario pa por krea nan propio empresa. E próksimo lunanan aki JCI IOBA Curaçao ta organisá diferente aktividat den kuadro di e proyekto aki.

E kulminashon di e proyekto ta e premiashon di e empresario hóben di mas kreativo di 2015 i tambe di e hóben empresario aspirante di mas kreativo. Partisipashon pa Creative Young Entrepreneur Award (CYEA) ta habrí pa tur empresario i tambe esnan ku ta aspirá pa bira empresario, E proseso di nominashon ta simpel. E partisipante por inskribí su mes of por wòrdu nominá dor di un otro persona. Un hurado konsistiendo di personanan konosí i/òf eksitoso aktivo den e áreanan empresarial i ekonómiko lo skohe e ganador for di e inskripshonnan.

Bo ta un empresario hóben i kreativo? JCI IOBA Curaçao i Banco di Caribe ta invitá abo pa partisipá den e Creative Young Entrepreneur Award 2015!

Pa mas informashon por bishita e wepsáit www.iobacyea.com of tuma kontakto via e-mail na cyea.curacao@gmail.com.