Willemstad, 06 òktober 2015 – Despues di su eksitoso ‘Executive Corporate Trainings’, JCI Dutch Caribbean ta invitá abo komo siudadano aktivo na dos training interesante riba dianan 15 i 16 di òktober próksimo na Hilton Hotel.

Di 15 pa 17 di òktober JCI Dutch Caribbean ta tene su National Convention anual ku ta konta ku partisipashon di miembronan for di Aruba, Boneiru, St. Maarten i Kòrsou. Durante e tres dianan aki miembronan di JCI ta bini huntu pa traspasá informashon i konosementu i alabes skohe e direktivá i presidente di JCI Dutch Caribbean pa 2016. E tema sentral durante e National Convention aki ta ‘Connecting all Sectors of the Society’, konektá tur sektor di nos komunidat na otro.
Djaweps 15 di òktober señor Steven Martina (Guardian Group) ta duna e training ‘Creating mutual understanding on all levels of an organization’ i djabièrnè 16 di òktober señor Adam Bonarek (JCI International, USA) ta enkargá pa duna e training ‘Leadership and Lollipops: looking at the ins and outs of motivation’. Ambos training tin komo meta pa krea i forma lidernan den nos komunidat i organisashon i kompanianan lokal. Ambos training ta habrí pa publiko en general i ta di 9.00AM pa 12.00PM na Hilton Hotel. Entrada ta FL 99,00 pa kada training i un pakete pa tur dos dia ta solamente $99,00. Pa inskripshon por bishitá www.jcidutchcaribbean.com òf manda un e-mail na jcidcnc2015@gmail.com.

Aña 2015 ta e aña ku JCI ta selebrando 100 aña di liderasgo i JCI Dutch Caribbean a krea oportunidatnan durante aña pa pueblo tambe djòin e selebrashon aki. Un invitashon kordial na un i tur pa asistí na e trainingnan riba 15 i 16 di òktober awor i asina amplia bo instrumentonan komo un lider i siudadano aktivo den nos komunidat.