WILLEMSTAD – Djasabra 23 di Mei JCI Creative Leaders In Curaçao (JCI CLIC) ta ranka sali ku e promé enkuentro sosial “Stand Out of The Crowd” entre miembro, eks miembro i senadornan di Female Jaycees, JCI Curaçao Wayaka i tur demas simpatisante di JCI na Korsou. E enkuentro social aki ta tuma lugá djasabra 23 di Mei di 6.30PM pa 10PM na Chobolobo Café (Landhuis Chobolobo).

JCI Creative Leaders in Curaçao (JCI CLIC) anteriormente konosí bou di e nòmber Female Jaycees, ku un historia eksepshonal i  despues a kontinuá komo JCI Curaçao Wayaka, a inisiá na januari di aña 2015 ku elekshon i instalashon di un direktiva kreativo nobo. E direktiva di 2015 ta konsistí di presidente Dupal Persaud, presidente saliente Reshma Schotborg, tesorero Tiffany Cristina, sekretaria Ann-Mary Bloem, vise presidentenan Ednella Gosepa i Guillomir Servanie. E direktiva nobo di JCI CLIC ta responsabel pa maneho, kresementu i kontinuashon di e organisashon den e añanan benidero. E lema di JCI CLIC pa e aña 2015 ta “Creating All Leaders of Tomorrow” (Kreando lidernan di mañan). Di e forma aki JCI CLIC ke empoderá su miembronan riba e tereno di liderasgo i tambe desaroyá nan abilidatnan pa garantisá lidernan integro i aktivo pa futuro. E resultado ta pa krea, na un manera impaktante, kambionan positivo den forma di proyektonan kreativo ku ta enfoká riba solushonnan sostenibel pa diferente nesesidat den nos komunidat. E aña aki ta unu hopi importante i speshal pa e organisashon aki komo ku a parte di a kambia nomber támbe ta selebra 40 aña di eksistensia i alabes 100 aña di e moveshon mundial di JCI. É promé enkuentro sosial titulá “Stand Out of The Crowd” ta tuma lugá djasabra 23 di Mei di 6.30PM pa 10PM na Chobolobo Café (Landhuis Chobolobo). JCI CLIC ta invitá tur miembro, eks miembro i senadornan di Female Jaycees, JCI Curaçao Wayaka i tur demas simpatisante di JCI na Korsou pa bin “CLICk”. Korda konfirmá bo presensia atrabes di board@jciclic.org. Di e forma aki JCI CLIC ta ranka sali ku e kampaña di 40 aña di esksitensia ku lo kulmina na luna di Oktober ku un selebrashon grandi.
JCI Creative Leaders In Curaçao (JCI CLIC) ta un di e organisashon nan lokal ku ta afiliá na Junior Chamber International (JCI). JCI ta e organisashon mundial di lidernan entre 18 pa 40 aña ku ta dediká na trese kambio positivo den nos komunidat.  Si abo komo individuo òf kompania ke desaroyá i tambe kontribuí na nos komunidat, tuma kontakto ku direktiva di JCI CLIC na board@jciclic.org. Pa mas informashon tokante JCI CLIC, bishitá nos website www.jciclic.org, sigui nos via  www.fb.com/jciclic.