WILLEMSTAD:- Asina mes! Un otro disko di Ir-Sais a kuminsá zona na radio,”Mi a warda e ambiente di mundial pasa pa mi por hasi introdukshon di un otro piesa, mi ta spera ku e kai na agrado di e públiko bailadó. Spesialmente esnan ku ta amante di zouk/ kizomba.”, esaki di akuerdo ku e kantante. “Deeper” e kansion nobo di Ir-Sais un biaha mas ta konta ku presentashon spesial di otro artistanan ku a kolaborá den e kansion, ta trata aki di Enmeris i Rocco- ámbos kantante no mester di niun introdukshon. Enmeris ya kaba a kolaborá riba un otro éksito ku ketu bai ta zonando “Nada no ta Pasando”. Pareu ku lansa e piesa, tambe ta hasi introdukshon di e videoclip. Esaki ta e di dos videoclip ku Ir-Sais ta lansa pa aña 2014. Komo direktor di imágen e biaha aki Ir-Sais a traha ku Luis Arias ku a pèrkurá pa inkluí tur e sabornan ku e piesa tin i a tradusí esakinan den imágennan ku sigur ta representá e piesa. Miéntras ku na Hulanda Ir-Sais ta sigui ku su presentashonnan huntu ku Bollebof, Keizer, Gio i otronan, a kuminsá prepará un mini-tour ku lo mester kubri tur tres isla. Dia 26 di yüli próksimo Ir-Sais & friends lo ta na Boneiru siguí pa dia 1 di ougùstùs na Kòrsou i finalmente dia 2 di ougùstùs na Aruba. “Mi ke tuma e oportunidat di gradisí tur fanátiko pa nan sosten, tur amigu músiko i kolega kantante pa nan kolaborashon, na Ser Supremo pa e inspirashon, talento i determinashon pa alkansá éksito. Mi famia ku nunka a stòp di kere den mi. Danki na tur radio-emisora i Dj(nan) pa toka mi piesanan… na pueblo di Kòrsou, Boneiru i Aruba, nos ta topa pronto i ta spera ku tur loke mi presentá na boso lo konta ku boso apresio i aseptashon”. E kansion nobo di Ir-Sais ya kaba por wòrdu skuchá na tur radio-emisora i e videoclip ta konta ku 17,000 views den 3 dia, ta premirá ku durante di e próksimo dianan esaki lo sá di oumentá.