WILLEMSTAD— Dia 1 febrüari próksimo, 5’or di atardi, na Villa Maria, tur hóben entre 12 i 30 ta invitá pa elehí e 9 promé miembronan di e Konseho di Hubentut bou di direkshon di e Plataforma Nashonal pa Desaroyo di Hubentut. Kada hóben kandidato ku a postulá nan mes pa forma parti di e Konseho di Hubentut, lo presentá nan vishon pa ku e prioridatnan di desaroyo di hubentut. Tur hóben presente e dia ei na Villa Maria lo haña chèns di hasi e eskoho final di e 9 promé miembronan di e Konseho di Hubentut ku nan ke pa papia na nan nòmber.

Plataforma Nashonal pa Desaroyo di Hubentut tin na su enkargo implementashon di e Programa di Akshon Desaroyo di Hubentut 2015-2020. Segun Daniel Corsen Jr. Presidente di e Plataforma, “for di inisio partisipashon di hóbennan tabata sentral, paso nos no por papia di maneho ni proyektonan pa logra desaroyo di hubentut sin nos tende di hóbennan mes kiko nan ta haña importante i kon nan ta mira nan propio desaroyo. Den e kuadro ei nos a organisá na 2015 e Diálogo Nashonal di Hubentut i riba un base regular nos a organisá konsulta ku hóbennan. Pero ku e Konseho di Hubentut nos lo tin un ‘klankbord’ regular pa konsultá kuné, ku alabes tambe lo yuda nos pa keda stimulá partisipashon di hubentut”. Partisipashon di hubentut formal konosé diferente forma i meta, por ehèmpel siña hóbennan mas di gobernashon i funshonamentu di diferente organo gubernamental di un país; aki por pensa riba e struktura di Parlamentu i Gobièrnu hubenil. Pero ta eksistí Konsehonan di Hubentut (youth councils) tambe pa diferente organisashon i hasta pa kompanianan rònt mundu i den Karibe. Ta balorá nan komo un struktura importante pa tene kontakto ku hóbennan riba vários tópiko i pa konektá e eksperensha i opinion di hóbennan ku e ideanan i/òf maneho di un organisashon. Otro for di un parlamentu, meta di e struktura aki ta pa e hóbennan duna konseho sea pidí òf nò pidi na Plataforma Nashonal pa Desaroyo di Hubentut i gobièrnu riba spesífikamente e tema di maneho i desaroyo di hubentut. E Konseho di Hubentut lo tin tambe komo parti di nan responsabilidat, pa yuda organisá aktividatnan pa embolbí hobennan ku e prioridatnan den e diferente areanan di enfoke.

Hóbennan mes lo skohe e Konseho di Hubentut dia 1 febrüari próksimo. Pa un periodo di máksimo 2 aña, 9 hóben, entre 14-24 aña, lo interkambiá i deliberá ku Plataforma Nashonal pa Desaroyo di Hubentut riba diferente di e puntonan di prioridat den kuadro di e 5 áreanan di enfoke, kual ta Edukashon i Kuido, Salubridat i Bienestar, Trabou i Empresario, Bibienda i Ambiente di bida i Seguridat. Durante henter e periodo aki lo konsultá ku e Konseho di Hubentut riba situashonnan aktual i preguntanan di diferente ministerio i organisashonnan ku ta traha ku hubentut i naturalmente preguntanan di hóbennan mes.

Plataforma Nashonal pa Desaroyo di Hubentut ta ekstendé un invitashon na tur hóben entre 12-30 aña pa bin selektá nan kandidato dia 1 di febrüari próksimo ku lo bai haña e oportunidat pa sinta den e promé Konseho di Hubentut. Lider di e proyekto Neelam Melwani ta komentá, “kon ku bai bin lo representá abo komo hóben, pues esaki ta bo chèns pa bin skucha e motivashon di e kandidatonan, hasi pregunta i hasi bo selekshon. E Konseho di Hubentut lo komuniká deseo i preokupashon di abo komo hóben ku e Plataforma Nashonal pa Desaroyo di Hubentut i otro stakeholder. P’esei ta importante pa e kandidatonan sa ku tin hóbennan pará nan tras i ku ta kompartí nan opinion.” Registrá via whatsapp +59995683976 of via página di FB Desaroyo di Hubentut. Pa mas informashon di e kandidatonan keda pendiente via página di FB Desaroyo di Hubentut.