WILLEMSTAD- Ministerio di Desaroyo Ekonómiko a tuma nota den algun medio di komunikashon di un informashon eróneo ku ta sirkulá enkuanto bòternan di whisky ku a wòrdu enkontrá sin ‘batchnummer’ na Goisco Wholesale i di e forma aki kier rektifiká e informashon aki.

Tur produkto ku ta keda importá riba nos teritorio mester ta dispone di un asina yamá ‘batchnummer’. E ‘batchnummer’ aki ta un number di identifikashon úniko ku ta keda asigná na produkto/materialnan via di e fabrikante. E ‘batchnummer’ no ta stipulá fecha di vensementu di un produkto. E ‘batchnummer’ ta wòrdu uzá pa por sigui e orígen i e originalidat di produktonan ku a/ta keda importá. E tim multidisiplinario enkabesa pa inspekshon ekonómiko di MEO a risibí notifikashon resientemente ku lo mester tin bòternan di whisky riba merkado ku no ta dispone di e ‘batchnummer’ di e fabrikante. A kondusí e kòntròlnan nesesario i enberdat a bin topa ku algun bòter di whisky sin ‘batchnummer’ entre otro na e establesimentu di Goisco Wholesale.
E lote di whisky aki lo mester a drenta via di e kanalnan legal kual ta nifika ku e establesimentu(nan) na unda a enkontrá e bòternan aki no a kometé ningun delito ekonómiko.

Aktualmente e situashon ta bou di investigashon dor di tur e partidonan konserní pa asina por yega na un solushon struktural den esaki. Loke si nos ministerio kier aklará ta, ku no ta trata di iregularidat ni tampoko ilegalidat spesífikamente na e establesimentu di Goisco Wholesale en partikular manera por a aparentá via di medionan di komunikashon den e dianan tras di lomba.