Desde e luna aki lo introdusí e karachi digital di seguro pa vehíkulo. Asina shofùrnan tin akseso na nan karchi di seguro via nan telefòn selular. Esaki lo fasilitá e kontròl di tráfiko i na instansianan. Pa medio di un app, Forensys, CRS,Wegenwacht 24/7, ontvanger i polis por scan e kódigo QR i mésora por averiguá tur dato. Asina e proseso di balidashon lo ta efikas i e kooperashon entre kompanianan di seguro i outoridatnan lo ta mas direkto.

E kompania di seguro ta traha e karchi digital i ta fásil pa download esaki riba telefòn di e asegurado. Asta sin konekshon di internet e karnèt semper ta asesibel. Ta trata di un inisiativa di kompanianan di seguro ku kolaborashon di outoridatnan.

Na promé luga e kompania di seguro Guardian Group Fatum, ENNIA, Citizens, Seguros Brouwer i BSure lo implementá e proyekto. Asina nan ke promové digitalisashon mas aleu di Kòrsou pa den e temporada benidero nos isla por profilá mihó. Den futuro lo ta posibel pa añadí otro datonan tambe na e sistema, manera datonan di keuring i kantidat di aña sin daño.

Pronto mas kompania di seguro tambe lo bai partisipá na e inisiativa akí. Ta trata di un proyekto desaroyá i kargá pa e kompania Kurasoleño INSight Insurance Platform.