E promé konferensia di teknologia i ‘Startup’ den Caribe:

Willemstad/ Oranjestad: Dianan 28 i 29 di ougùstùs próksimo lo tuma lugar e konferensia di ATECH* na isla ruman Aruba. Un konferensia úniko ku enfoke riba teknologia i ku e meta pa establesé islanan den Caribe komo pioneronan den inovashon i teknologia. Djaweps atardi na Bikini’s Curaçao establesé riba e bulevar na Mambo, sr. Kris Croes i sr. Kiume Tjon-A-Tsien di ATECH* a introdusí e proyekto na miembronan di prensa i un grupo selekto di invitado aki na Kòrsou. Durante di e enkuentro ku prensa a elaborá riba e oportunidatnan di partisipashon di Kòrsou na ATECH* ku próksimamente lo tuma lugar.

ATECH* ta repartí den dos dia, e promé dia lo enfoká riba temanan manera, kon pa kuminsá un negoshi ku e teknologia modèrno, merkadeo i finansiamentu di un ‘Startup’. E temanan lo wòrdu presentá dor di oradornan internashonal ku ta aktornan klave den mundu di teknologia rònt mundu. Durante e promé dia lo tin vários ‘break-out sessions’, diferente tayer i diskushon den pènel. E di dos dia di ATECH* lo ta prinsipalmente un ‘demo-day’, na unda ku 5 ‘Startups’ lo presentá nan idea ku prototipo. E presentashonnan lo wòrdu huzgá dor di un hurado profeshonal. E ganador lo bai kas ku $ 20,000.-.

Kon pa partisipá:

E 5 ‘Startups’ (nan) lo wòrdu skohé basá riba nan aplikashon ku nan por manda via www.atechconference.com ATECH* ta tuma aplikashonnan lokal i International pa por partisipá na e Demo Day. Klaro, ku Kòrsou tambe por partisipá. ATECH* ta enkurashá tur ‘entrepreneurs’ i ‘startups’ ku ta deseá di tin e oportunidat pa presentá nan ideanan inovativo pa apliká.

ATECH* lo tin presentashon di 20 orador internashonal ku lo deleitá fanatikonan di teknologia i entrepeneurs ku nan konosementu i eksperiensha den e área aki. Abo ta un empresario nobo i ta un fanátiko di inovashon i teknologia? No pèrdè e oportunidat di konosé i sá mas. Pa mas informashon di e konferensia aki, ku dianan 28 i 29 di ougùstùs próksimo lo tuma lugar na Aruba bishita nan wepsáit of página riba Facebook www.facebook.com/ATECH   pa mas informashon. Interkambiá eksperiensha, ideanan ku otro empresarionan i probechá di e oportunidat aki sosialisá den e mundu di ‘startups’ i stimulá otro kreando teknologia nobo i diferente.