Introdukshon

E aña aki IATA ta selebrá su di 70 aniversario: Na aprel di 1945, 57 kompania di aviashon di 31 pais a reuní na Havana, Cuba pa lanta International Air Transport Association (IATA). Awe nos organisashon a krese bira unu di 260 kompania di aviashon komo miembro i e aña aki so, nos miembronan lo transportá mas ku 3.3 bion pasahero, kasi 52 tonelada di karga via un ret mundial di un 50 mil ruta.

Unda nos ta aworakí

Mirando padilanti, e kantidat di pasahero di aviashon mundialmente lo bira dòbel den e 20 añanan binidero, ku un oumento di 4.0% pa aña di kresementu di tráfiko. Pa duna bo algun ehèmpel di e kontinente Merikano, Colombia su merkado doméstiko lo surpasá merkadonan doméstiko britániko i franses na 2019 miéntras ku biahamentu aereo doméstiko na Brazil, no opstante ku e pais su ekonomia a bai atras, lo surpasá e merkado doméstiko di Hapon na 2022 i establesé su mes den e tòp 3 di merkado aereo doméstiko mundial.

Mare mi por a bisa ku nos tin pronostikashon asina favorabel pa Kòrsou i su bisiñanan karibense tambe. Lástimamente, mayoria di Karibe no ta gara e oportunidat pa kria un industria di transportashon robusto ku lo promové un industria di turismo mas fuerte, mas konektividat inter-regional i mas kresementu ekonómiko. Awe, turismo i aviashon ta fasilitá i sostené kasi un mion trabou i ta kontribuí US$14.8 bion, mas o ménos 8.7% di Karibe su PDB. I ounke e kontribushon aki ta zona signifikante, e por ta hopi mas.

Pa esaki por sosodé, e gobièrnunan den e region mester koperá estrechamente ku e industria di aviashon usando regulashon mas efisiente i opservando mihó práktikanan mundial. Tambe nos ta urgi gobièrnunan den e region pa kòrda ku e balor real di aviashon ta e konektividat mundial ku e ta trese kuné i e desaroyo ku e ta stimulá, i no e pagonan i impuestonan ku por kobra.

Rònt mundu tin hopi ehèmpel bon pa sigui, di pais ku nan gobièrnunan ta koperá ku e industria di aviashon, ku aeropuertonan i otro interesado, pa sigurá e bentahanan ekonómiko úniko ku por haña di konektividat aereo amplio. Paisnan manera Dubai i Singapore, i mas serka Panamá i Chile, tur ta trata e industria aereo komo partner, i e resultado ta ku e industria a krea un balor tremendo pa tur e merkadonan aki.

Un mapa pa Kòrsou

E tipo di asosiashon di partner aki, pa benefisio mútuo i planeamentu di término largu, lástimamente te awe no ta tumando lugá na Kòrsou. Mi a urgi gobièrnu i interesado di e industria manera Curaçao Airport Partners (CAP) i Dutch Caribbean Air Navigation Service Provider (DC-ANSP) pa usa un proseso di konsultashon transparente i inklusivo ku e industria, segun rekomendashonnan di International Civil Aviation Organization (ICAO), prome ku nan introdusí kambio ku ta afektá e kompanianan di aviashon. Resientemente CAP i DC-ANSP a bisa ku nan tin intenshon di oumentá loke nan ta kobra. Nos a reuní ku e interesadonan aki i a urgi nan di duna tur informashon nesesario pa un bon proseso di konsultashon. Pa papia simpel, e kompanianan di aviashon mester forma parti di e proseso for di kuminsamentu, pa sigurá un resultado positivo pa tur. Segun prinsipionan di ICAO, nos ta komprondé e nesesidat pa kompania di aviashon kubri nan gastunan rasonabel, pero, e industria mester di un proseso di konsultashon kompletamente transparente pa sigurá ku e loke ku ta kobra ta rasonabel i hustu pa un i tur.

Den un reunion ayera ku Ekselensia Minister Camelia-Römer, Curaçao Civil Aviation Department, Curaçao Airport Holdings i otro interesado prominente di e industria, nos a haña sa ku gobièrnu ta desaroyando legislashon pa regulá  tarifanan di aeropuerto i ANSP den e pais. Durante di e enkuentro nos a bisa bon kla ku miéntras ku e industria di aviashon no ta oponé e legislashon aki, IATA ta urgi pa inkluí e kompanianan di aviashon den e proseso, segun rekomendashonnan di International Civil Aviation Organization (ICAO). Muchu biaha nos ta mira ku si ekskluí e industria di desishonan importante asina, esaki lo resultá den kreashon di un struktura di tarifa molestoso i inefisiente ku ta debilitá konektividat aereo i ekonomia lokal. Afortunadamente su Ekselensia Minister a primintí di duna e industria di aviashon un oportunidat pa komentá riba e legislashon ku a proponé, loke ta un desaroyo masha positivo pa futuro di transpòrt aereo na Kòrsou.

IATA a rekomendá tambe e mekanismo pa pone preis den un solo kaha, loke ta sigurá ku ta tene kuenta ku tur aktividat di aeropuerto, inkluso esnan aeronoutiko i komersial, ora determiná e nivel di gastunan ku e aeropuerto ta kobra. Ta e mekanismo di kobra di mas apropiá komo ku e ta reflehá e preis ku aeropuertonan lo a kobra si nan tabatin kompetishon realista.

E pasonan aki, ku ta garantisá un ambiente di operashon efisiente pa e industria aereo, ta krítiko den un region ku ta dependé asina tantu di turismo manera Kòrsou i su bisiñanan  karibense. E impuestonan i gastunan opresivo ku hopi pais den e region ta pidi di biahero i kompania  di aviashon ta hasié un destinashon masha karu pa bula bai i un destinashon difísil pa kompania di aviashon hasi negoshi kuné. E resultado ta ku aviashon no por hunga un papel mas grandi den su ayudo pa ekonomianan lokal krese mas i pa stimulá kreashon di empleo.

Pa papia simpel, e preis haltu di bulamentu ta kore ku bishitante. Tin kaso kaminda impuesto ta kasi 65% di preis di e teket den Karibe i turistanan potenshal ta opta pa destinashon ménos karu pa motibu di esaki. Anto biahero ku ta bula ta e bishitantenan ku mas balor pa e region. Nan ta gasta un promedio di entre $1.000 pa $1.400 den un bishita di kuater dia kaminda e bishitante di un barku krusero típikamente ta gasta entre $70 i $200, dependiente di e destinashon.

Konklushon

IATA tin e konvikshon firme ku mester bira partner pa benefisio mútuo, pasobra ta un elemento klave pa forma resultado positivo i nos ta enkurashá ku Su Ekselensia Minister Camelia-Römer lo tuma e akshonan ku a primintí pa fortifiká partisipashon di gobièrnu den industria di aviashon. E akshon valiente aki ta indispensabel i lo laga e kompanianan aereo generá e kresementu ekonómiko transformativo ku ta nos industria so por entregá. Mi a mir’é mehorá bida i oumentá prosperidat den nashonnan kaminda ta sostené transpòrt aereo i mi ta konvensí ku nos por logra esaki na Kòrsou tambe. Masha danki, gustosamente lo mi ke kontestá boso preguntanan.