WILLEMSTAD:- Dia 8 di januari último,  durante e promé reunion di aña di JCI IOBA Curaçao, a instalá  direktiva di 2015. E direktiva ta konsistí di 9 hoben aktivo ku a keda elegí dor di miembronan di JCI IOBA Curaçao na  òktober di 2014 i awor ta klá pa guia e organisashon durante e aña aki. Konsiderando e lema di JCI Dutch Caribbean den 2015, “Lead to Succeed”, JCI IOBA Curaçao komo un dje 7 kapitulonan di JCI den e región Hulandes Caribense lo bai “Lead from Within” den 2015. Pa garantisá un fluho sostenibel di lidernan kapasitá pa hasi impakto den nos komunidat mester traha riba e kalidat di e individuo. Basa riba esaki lo organisá diferente aktividat i evento pa kontribuí na e desaroyo di nos lidernan, pa implementá òf proponé solushonan sostenibel pa problemanan òf nesesidatnan di nos komunidat i kumpli ku e mishon i vishón di JCI. E direktiva di 2015 ta konsistí di Milagros Rodriguez Navarro komo presidente, Sueena Francisco komo vice presidente ehekutivo, Juweel Soleana komo sekretaria, Brian Samson komo tesorero, Elton Villareal, Nevita Mezas, Sugeidy Windster i Richney Felipa komo vice presidente y D’Angelo Alexander komo presidente saliente, JCI IOBA (Involvement of Banda Ariba) Curaçao ta un organisashon lokal ku ta afiliá na Junior Chamber International (JCI). JCI ta e federashon mundial di lidernan entre 18 pa 40 aña ku ta dediká na trese kambio positivo den nos komunidat. Pa mas informashon tokante JCI IOBA Curacao por bishita nos website www.jci.cc/local/ioba òf bishita e página di facebook di JCI IOBA Curaçao.