Curaçao ZOO ku Fundashon Parke Tropikal ta operá, a konmemorá djasabra 8 di ougùstùs ku e leon tan stimá King a kumpli un aña ku e no t’ei mas ku nos.

Sra. Leo  na nòmber di hinter famia a hasi un gesto mashá bunita di laga traha e piedra di graf aki pa asina tur ku ta bishitá nos Zoológiko nashonal “Curaçao ZOO”, por keda kòrda e leon ku tur hende a stima.

King ku su pareha Simba tabata último dos leonnan di mas ku 10 leon ku nos Zoológiko a konosé. King i Simba a bin di Venezuela na aña 2005. For di komienso di añanan 50 nos Zoológiko tabata kuida diferente leon. E promé dos leonnan ku a bin tabata Sasha i despues Emil. Asina durante dékada ochenta a bin algun leon hembra i por último nos tan stimá King. E amor i afekto ku King a risibí ta reflehá riba e piedra aki ku palabranan fuerte pero real.

Un leon por biba un promedio di 13 pa 17 aña den naturalesa. Den kuido di hende  esaki por ta hopi bes 5 pa 10 aña mas debí na mihó nutrishon i tambe e echo ku e no tin enemigu natural, loke ta pone ku nan bida ta mas trankil. No ku esaki ta e solushon, un animal salbahe tin ku biba i lucha pa sobrebibí esei ta e prinsipio di bida/naturalesa.

Pero debí na e manera ku ser humano a trata e planeta aki pa hopi dékada kaba, a pone ku ta kasi imposibel pa animalnan eksótiko sobrebibí den nan ambiente natural.

Resientemente Curaçao Zoo a bira miembro di International Species Information System i ta uza e software ku yama ZIMs pa asina konektá ku rònt mundu pa tin mihó informashon riba tur animal den zoológiko òf santuarionan rònt mundu. Pa fin di ougùstùs Promé minister Asjes, minister di ministerio di Salubridat, Medioambiente i Naturalesa sr. Whiteman lo risibí e business case ku ta amplia riba e masterplan di Curaçao ZOO.

Den futuro no ta deskartá e posibilidat di tin leon den nos Zoológiko bèk, esaki debí na programanan di interkambio fuerte i reprodukshon rònt mundu pa garantisá kontinuidat di bon liña di sanger, pa asina nos futuro generashonnan tambe por disfrutá di e animalnan aki den naturalesa.

E grupo di Studio Acht Caribbean a krea un impreshon kon e habitat nobo pa e leonnan lo por bira. Esaki ta  diseñá segun reglanan internashonal ku ta konta ku mas ku 144 punto di atenshon pa por duna  bon kalidat di bida  na  un promedio di 3 leon. E animalnan aki lo mester di mínimo 1 hèktar pa biba ariba, ku ta un tereno habri ,ku ta será na un manera sigur pero alabes amikal pa e bestianan por sinti nan mes bon. Kada detaye di e masterplan di nos Zoológiko nashonal ta tuma hopi tempu i pa esaki nos ta pidi komprenshon i hopi pasenshi. Nos ta sigurá un i tur ku koperashon di Gobièrnu, sektor privá i boso ku ta bishitá nos,  ku nos lo logra sigur.

Pa mas informashon bishitá nos página di Facebook; Curaçao Zoo & Nature Reserve òf yama nos na 7360188. Tambe por mail nos na info@curacaozoo.com