Willemstad- Pa fin di mei Inspekshon di Impuesto ta bai kuminsá implementá e lei di Onroerende-zaak belasting 2014 (OZB). E lei akí ku Parlamento a aprobá na mei di 2013 ta bai remplasá kuminsando dia promé di yanüari e “Grondbelastingverordening 1908” ku ta hopi antikuá. A modernisá e balorashon di inmóbil i e tarifa a bira progresivo.
E kambionan den OZB ku ta referí na impuesto riba tereno.
A modernisá e konseptonan den e lei di OZB i e ta pas mihó ku ‘best practice’ den moda di pensa aktual tokante impuesto riba asuntu inmóbil. Ademas a adaptá e tarifanan i hasi nan progresivo. Loke ta inskribí na Kadaster na kuminsamentu di aña en prinsipio ta desisivo pa ken lo ta esun ku lo mester paga e OZB. E balor riba kua lo mester paga e OZB ta e balor den transakshon ekonómiko. Esaki ta e preis pa kua por bende un inmóbil sin ningun kargo ariba na kualke tersero ku por tum’é den uso imediato i kompleto. Lo kobra impuesto riba inmóbil ku tin riba tereno di hür di pais Kòrsou, for di esun ku ta hür e tereno serka pais Kòrsou. Mester paga aanslag definitivo di OZB serka Ontvanger denter di dos luna di e fecha. Pa voorlopige aanslag ta konta ku por hasi esaki den mes tantu término ku tin ainda despues di e fecha di e aanslag.
Taksashon
Lo balorá tur asuntu inmóbil ku ta kai bou di OZB (I ku no ta eksonerá) pa stipulá nan balor. Ta spera ku e taksashon akí lo bai tuma algun aña en bista di e gran kantidat di asuntu ku mester balorá. Pa e trabou akí a kontratá diferente taksadó outorisá ku den ekipo lo pasa den bario i tereno. Komo prinsipio e taksashon lo tuma lugá di pafó; es desir lo no pidi bo pa laga e taksadó drenta pa mira paden. E taksadónan por mustra nan legitimashon. Meskos ku pa e “Grondbelasting” anterior, pa OZB tambe e plaso di 5 aña ta konta den kua ta sólamente den sierto sirkunstansha ta revisá e balor, p.e. si tin kambio di e inmóbil. Ke men ku e promé término di e balor pa OZB ta e periodo di dia promé di yanüari di 2014 te ku dia 31 di desèmber di 2018. Despues di e taksashon e pagadó di impuesto ta risibí un karta di inspektor den kua ta anunsiá e balor nobo i den kua ta bisa tambe ku por entregá kontra-argumento, eventualmente produsiendo dokumento di prueba (Rapòrt di taksashon, èts.) E pagadó di impuesto lo haña algun siman di tempu pa hasi esaki.
Aanslag
Pa mas tardá na sèptèmber di 2014 tur persona i instansha ku mester paga OZB lo risibí un voorlopige aanslag OZB riba 2014, ku ainda ta basá riba e balor anterior, pero riba kua a apliká e tarifa nobo. Despues di a fiha e balor pa promé di yanüari di 2014, loke por ta den 2014 mes, pero por ta te na 2016 tambe, en bista di e kantidat di asuntu ku tin pa balorá, lo sigui e aanslag definitivo di OZB for di 2014 pa tur a añanan pa kua a pone un voolopige aanslag. Despues di a risibí e promé aanslag definitivo esun ku debe e impuesto por entregá opheshon kontra e balor usá den e aanslag ei. Despues di a fiha e balor definitivo i a kaba ku e trato final di tur eventual karta di opheshon i di apelashon, e balor ta fihá pa henter e periodo di 5 aña i no por entregá opheshon kontra di e balor fihá ei mas durante e añanan ku a keda di e periodo.
Kampaña di informashon
Pa informá komunidat bon tokante e lei akí Inspekshon di Impuesto ta tene un kantidat di reunion informativo: Dia 19 di mei na Sentro di Bario Tera Kora, dia 21 mei na Biblioteka Publiko den Scharloo i dia 22 di mei na Sentro di Bario Montaña. E reunionnan di informashon ta kuminsá shete or anochi. Tur hende ta bonbiní. Lo kuminsá ku un kampaña di informashon tambe na medionan pa pone komunidat na altura di e lei ku a drenta na vigor i su implementashon. 
Pa mas informashon tokante OZB i e proseso di implementashon Inspektor ta referí na e website www.ozb.belastingdienst.cw. Riba e website aki tin dato tambe tokante e reunionnan di informashon i e posibilidat pa hasi pregunta via telefòn, e-mail òf personalmente.