WILLEMSTAD – Djabièrnè atardi inskripshon a habri pa di dos edishon di e Sambil Run & Walk di djadumingu awor (25 di sèptèmber) ku start i final na Sambil. Sinku kandidata pa Miss Curaçao 2016 tabata presente pa buska nan flanèl kolorido, pasobra nan ta bai kana e distansia largu di 10 km. Nan a saka potrèt tambe ku esnan ku a bin inskribí e atardi ei. Sin importá ku nan tabata riba hilchi haltu, nan a partisipá tambe na e ehersisio di zumba.

E kaminata pa ta henter famia, grandi i chikí. Pa partisipá na e kaminata sea riba 5 òf 10 km ta rekerí pa inskribí di antemano. Te i ku djasabra por inskribí durante e orario di Sambil. Adulto ta paga 15 florin i mucha (te 12 aña) 10 florin pa e flanèl ‘dry’. Por paga na efektivo so. Sinembargo, esnan ku ke kompetí riba e distansia largu tin un chèns so mas djaluna anochi entre 6 pa 9 or na Sambil pa inskribí na e mesa di Road Runners’ Club Kòrsou. E grupo aki por gana medaya i kopa den diferente kategoria.