InselAir ta enfoká pa kontinuá duna pasaheronan transporte aéreo sigur i pagabel pa destinashonnan denter di e region Pan Amerikano.

Willemstad – Curacao. InselAir a sobrebibí e retonan operashonal ku resientemente el a konfrontá i ta proyektando su rumbo pa futuro dor di agregá destinashonnan nobo, mas servisio i agregando 4 avion na su flota. InselAir ta apresiá e lealtat, komprendementu i sosten ku mayoria di e pasaheronan a demostrá na e aeroliña lokal durante e periodo akí.

Siguridat na promé lugá

“Siguridat ta i lo ta semper e prioridat prinsipal den InselAir. Pa e motibu aki InselAr tin su propio timnan di mantenshon i di mekániko ku ta kuida nos 19 avionnan i tur nos pilotnan i personal di kabina ta bon formá. InselAir ta den poseshon di e sertifikado di IOSA for di 2011 loke ta nifiká ku InselAir ta kumpli ku tur stándart internashonaldi siguridat & protekshon di nos industria”, Albert Kluyver, kende ta Chief Executive Officer di InselAir ta deklará. Tur InselAir su avionnan i nan motornan ta bou di supervishon minusioso di InselAir su propio timnan di mantenshon i di mekániko pa medio di un programa di monitoreo di trènt di e motor ku asistensia di e fabrikantenan di motor i/òf avion. E ehekushon di buelo i nan fase ta kai bou di vigilansia di un sistema di monitoreo di data di buelo. Ademas, personal di kabina i piloto ta pasa hopi ora den training di simulashon di buelo pa vários prosedura di emergensia. Esakinan ta solamente algun di e proseduranan ku InselAir, i hopi otro aeroliña, entre otro ta tene nan mes na nan. Tin un motibu ku transporte aéreo global a bira e medio di transporte mas sigur den mundu.

Operando for di un isla

Pa por keda kumpli semper ku e stándartnan di siguridat, tur aeroliña rònt mundu mester tene nan mes na mantenshon general i/òf reparashon spesífiko den kaso di problema tékniko, algu ku ta inevitabel den nos industria. Den kaso di InselAir, ku tin su base prinsipal riba un isla esaki ta trese sierto reto èkstra kuné. Esaki te hasta ta sali mas na klaridat ainda ora ku un avion ta konfrontá problema tékniko pafó di nos base prinsipal ora ku logra haña e sosten eksakto ta mas difísil ainda. Por ehèmpel, ta tuma mas tempu pa hiba e piesanan di reserva i bo mes mekánikonan lisensiá, i tin ora mekánikonan eksterno na e destinashon kaminda e avion ta. Pa kubri esaki InselAir tin su mes fasilidat i tim di mantenshon pa por aktua lihé den kaso di trabou di emergensia òf reparashon. Tambe, InselAir tin un suministro di piesa di reserva i ta InselAir sumaneho pa semper tene un avion di a back-up kla pa kontinuá ku su operashonnan den kaso ku mester saka un avion for di operashon. Sinembargo, den e 3 simannan tras di lomba InselAir a konfrontá mas ku un AOG (avion ku no por bula) loke a tuma lugá simultáneamente na 2 diferente sitio pafó di Kòrsou. Te hasta ku tur e plannan i proseduranan bou di kontròl, ta un desafio grandi pa mantené un skema di buelo fleksibel i esaki a kondusí na lamentablemente na retraso. InselAir a logra di resolvé e retonan tékniko i operashonal dor di hasi pedida di e piesanan di reserva nesesario i dor di transportá esaki huntu ku e tim di mantenshon lisensiá pa e avion. Finalmente e trabou di mantenshon a tuma lugá ku éksito, ámbos avion a drenta operashon atrobe siman pasá. Te hasta ora welek a dal den un slùrf na Hato djasabra último i a sigui bai pa e avion, nos a logra di pone e avion akí bula atrobe.

Rumbo pa futuro

Otro aña InselAir ta spera di transportá 1.4 mion pasahero pa medio su hùbnan na on Aruba i Kòrsou. “Nos ta tuma nos papel den e ekonomia di Kòrsou, ku aktualmente ta 10% (di GDP), i di e otro islanan hopi na serio i nos tin ekspektativa di kontribuí ainda mas na e prosperidat di e islanan ABC dor di krea mas empleo, mas destinashon i mas biahe di plaser i di negoshi ku destinashon pa nos islanan’, Heerenveen a deklará. InselAir ta spera tambe di hinka 4 destinashon mas den su ret di ruta na 2016 i tambe 4 mas avion ta den e plan pa amplia e flota. Ademas lo establesé mas relashon di partner ku otro kompania loke lo resultá denmas destinashon pa e pasaheronan. InselAir ta finalisá 2015 ku 4 ruta nobo for di Miami. Kuminsando awe 2 di desèmber 2015, InselAir a kuminsá bula charter for di Miami pa 4 destinashon na Cuba; Santiago de Cuba, Camaguey, Havana i Holguin den koperashon ku 3 operador di tour merikasho. Buelonan lo varia di 1 buelo pa dia te ku 9 buelo pa dia ku ta disponibel solamente pa siudadano merikano i kubano.