Ta posibel ku pasahero ku último tempu a hasi uzo di servisio di InselAir, a haña nan konfrontá ku aplaso i por ta den sierto kaso ku kanselashon di buelo. InselAir ta rekonosé su problemanan i ta ofresé su diskulpa na tur esnan ku di kualke forma por a sufri inkumbiniensha. Nos ta konsiente di e frustrashon i e inkomodidat ku tabata resultado di esei.

Dunamentu di informashon
Un di e kehonan mas frekuente ta toka e falta di informashon adekuá i e echo ku lo no tabata atendé keho di pasaheronan perhudiká ku sufisiente atenshon. Gerensha ke enfatisá ku InselAir ku tur siguransa ta ambishoná un servisio muchu mas adekuá ku loke na e momentunan akí nos ta ofresiendo na nos klientenan. Sinembargo, e akusashon frekuente  ku InselAir no tin sufisiente atenshon pa kumbiniensha di su pasaheronan, ta algu ku ta duel nos. I nos ke splika bo kiko e situashon ta.

E preshon finansiero ku tin riba nos organisashon
E realidat ta ku InselAir na e momentunan akí ta konfrontando un situashon di cashflow súmamente desafiante ku ta konsekuensha di e debe di mas ku 100 mion dollar ku nos pais bisiña Venezuela tin serka nos. Pa mas ku seis aña largu Venezuela tabata un merkado krusial pa derecho di eksistensha di InselAir. Un merkado ku, pa motibu di e debe asina grandi, nos mester a bandoná parsialmente. Pa nos por mantené nos kompania salú den futuro tambe, nos a baha nos kuota di merkado di 34 pa menos ku 4 porshento i pareu ku esei nos a buska pa kompensá esei ku rutanan alternativo den nos region. I esei nos a hasi pa mantené organisashon i infrastruktura di InselAir na mes nivel i sigurá trabou di nos 750 empleadonan. Sinembargo, e tardansa di pago di Venezuela ta sigui ta un preshon konsiderabel riba nos organisashon i ta pone ku nos ta enfrentándo un reto finansiero grandi.

Kombatiente menor
Riba tereno di aviashon mundial, InselAir no ta mas ku un kombatiente menor. Si apesar di e retraso den pago for di Venezuela ainda nos ta logrando pa mantené nos mes riba pia, ta algu ku nos por ta orguyoso di dje. Ma nos no ta nos so. Pero, nos ta mashá gradisidu na nos suministradornan, na gobièrnu di Kòrsou i na nos kolaboradornan ku kada dia di nobo ta uni forsa ku nos pa enfrentá e reto pa sali for di e situashon problemátiko akí.

Respèt pa nos kolaboradornan
Gerensha ta mashá konsiente di e esfuerzo enorme ku tur santu dia tur kolaborador di InselAir tin ku hasi bou di e sirkunstanshanan difísil aktual. Nos tin gran apresio pa nan entrega i nan konfiansa. Den e situashon no mashá rekonfortante pero temporal akí nan ta hasi tur loke ta na nan alkanse. Pa medio di esakí, di kurason nos ta pidi nos klientenan komprenshon i pasenshi.

Seguridat na promé lugá
Den nos maneho seguridat ta e promé prioridat. Mester evitá tur situashon di inseguridat. Kualke tardansa ku esei por kousa ta resultado di e maneho di seguridat, i no tin nada di haber ku algo otro.

Esfuerso pa komuniká mihó
Rekonosiendo, ku en bèrdat falta di informashon adekuá bou di ningun sirkunstansha ta dependé di situashon finansiero. Nos ta debdatidamente konsiente ku mester drecha esaki. Turesten ku tras di kortina nos ta hasi tur esfuerso pa guia InselAir den bientunan menos brutu, suministrashon di informashon korekto i rápido tin nos atenshon apsoluto i imediato. Ya ta basta tempu kaba ku nos ta hibando kòmbersashon ku partner stratégiko pa logra invershonan importante i alabes huntu ku nan yega na un flota mas hoben kreando un futuro sólido pa InselAir. Ademas lo tin un reorientashon di InselAir su skema di buelo riba término korto.

Den e dianan nos dilanti InselAir lo tin ku enfrentá retonan grandi i nos ta spera di por sigui konta ku boso sosten den esei. Nos ta hasi tur loke ta posibel pa riba término kòrtiku pone nos servisio atrobe riba e nivel ku merkado ta eksihí i a konosé. Manera anunsía anteriormente na luna di sèptèmber, esaki lo bai ta posibel dòr di e grupo di pilotonan nobo ku a keda atkirí resientemente I tambe e regreso di algun avion den servicio despues di e mantenshon nesesario. Mientras tantu nos lo trata tantu ku nos por pa nos pasaheronan no mester sinti ningun, òf kasi nada di molèster di esei.

Un biaha mas, nos diskulpa pa e molèster. I pa e tempu ku ta bini, nos sa ku nos lo sigui duna honor na nos lema ‘Reaching higher’.