WILLEMSTAD – Den siman a firma e kontrato. Nan ta trahando duru na e interior. E suministro di e produktonan for di e pais di orígen Polonia si ta tuma mas tempu. Pero pa kuminsamentu di desèmber a plania ku e pakus nobo di Inglot lo habri den Sambil, hopi serka di Cinemark. Inglot ta un marka renombrá pa loke ta produkto kosmétiko di e kalidat mas haltu i na e kolónan mas ekstremo.

Ta hasi sinku aña kaba ku e empresa rekonosé internashonalmente Inglot, ku ta eksistí ya mas ku 30 aña i ku establesimentu rònt mundu, a habri un promé pakus nobo i moderno den Punda. Despues di amplio deliberashon i un eksplorashon sólido di e merkado, a disidí pa habri un di dos pakus na Kòrsou, esta den e sentro di kompra Sambil na Veeris. Country manager Jonathan Cohen di Sambil tabata enkantá ora e huntu ku e damanan Blanca Colmenares i su yu muhé Sabrina Liqui Lung por a pone nan firma bou di e kontrato di hür, pasobra yegada di e frankisia aki ta otro atkisishon grandi pa Sambil.