Willemstad – E talentoso diseñadó i artista, Wendell Andrew Elisabeth, ta invitá pueblo di Kòrsou na su promé tayer habri dia 28 di aprel te 5 di mei próksimo. Durante e tayer, Wendell lo habri su kas i kurason i kompartí su inspirashon pa ku e trabou ku ela bin ta hasi e delaster 36 aña. E siman di tayer lo tumá lugá na su atelier, ku ta den kurason di Punda unda e tin mas ku 25 aña ta biba. Di e manera akí, Wendell ta invitá pueblo di Kòrsou kordialmente pasa na Casa Keis i sera konosí.

Wendell su pashon pa krea nunka a para ketu i apesar di tur opstákulo ela sigui ekspresá su mes artístikamente. Promé komo bailarin teatral i despues komo un diseñadó i kosedó di talle. Wendell por diseñá i kose tur kos, for di trahe di baño, pañanan kasual, trahe di gala, shimis di kasamentu, te ku esun di mas kompliká ku ta flus pa hende hòmber. Durante e siman, Wendell tambe lo duna informashon na tur ku ta interesá, tokante su trabou komo diseñadó i kosedó i asina un i tur por sera konosí ku su atelier más djaserka.

Aktualmente Wendell ta profilando su mes riba tereno di arte komo pintor. Despues di basta aña di profundisashon i praktiká, unda su pashon a sigui oumentá, ela disidí di tuma un kurashi i kompartí esaki den forma di un eksposishon di su kuadro nan.

E apertura ofisial ta dia 28 di aprel 2018, di 7 PM pa 9 PM den edifisio di Casa Keis i lo keda habrí tur dia te ku 5 di mei entre 10 AM i 6 PM. E edifisio di Casa Keis ta situá den Punda, na skina di de Ruyterkade i Hanchi Vi Coco.

Pa asistí e apertura por fabor mèldu serka Wendell na wendell@wendellelisabeth.com