ORANJESTAD – Djaluna dia 22 di desèmber último, a tuma lugá na Aruba un impreshonante konsierto musikal dediká na e gran baluarte musikal Hilward Croes, o manera nan ta yam’é El Prínsipe, komo un forma di despedida for di e bida farandulero aki na mundu. Direktiva di AMAK, representá pa Manfred Gomes i Giovanni Atalita a presensia e akto solemne aki ku a konta ku ;presensia durante hinter anochi di Gobernador Fredys Refunjor i Señora. Di parti di Kòrsou, por a nota presensia di Reinir Lijfrock ku a kanta koro huntu ku Claudius Philips i tambe Hermanito ku manera semper ta graba  akontesimentunan importante manera esaki. Ta bon pa menshoná ku riba un fecha den luna di desèmber kaminda músikonan tin hopi presentashon, tòg no  menos ku 8 agrupashon musikal a sakrifiká nan a nochi pa rindi homenahe na e gran profeshonal ku tin un nòmber internashonal. Entre e artistanan ku a presentá a figura tambe Nancy Ramos i na final di e show tur hende por a disfrutá di e tremendo talento musikal di e yu di Hilward ku ta Angelo Kock, pero tambe di gruponan manera Tsunami, Claudius Philips i vários otro agrupashon musikal ,mas Na final di e anochi, diferente intérprete a kanta un tema musikal pa elogiá i duna tur honor na e gran Hilward Croes ku na un edat di 52 aña a ser yama pa kreador. Diferente personahe a hasi uso di palabra i entre nan ta pasa un grabashon di Chihi Peralta. Presidente di AMAK Manfred Gomes a hiba palabra na nòmber di músikonan di Kòrsou i na final a pidi mandatarionan pa wak e posibilidat pa mas pronto posibel nombra un  kaya na honor i memoria di Hilward Croes. E públiko a reakshoná ku un aplouso riba e sugerensia aki. Na final di e show, , Maikito Croes ku ta ruman mayó di Hilward a gradesí un kantidat di persona i instansia ku a kolaborá ku e aktividat di ayera i ku a konvivi ku Hilward durante su último dianan aki na mundu. Maikito tambe ta tin hopi bon palabra pa esfuersonan di AMAK ku a yuda konstruí un Asosiashon sólido pa representá Músiko i Artistanan Arubano. Hilward Croes tabata un tremendo músiko ku tabata toka, komponé, areglá i kanta na un  nivel musikal hopi haltu. Un gran músiko sigur di taya internashonal ta bai laga un bashí grandi atras na Aruba, pero tambe na otro Islanan ruman den Karibe manera Kòrsou. Direktiva di AMAK ta deseá famianan di Hilward Croes hopi forsa pa pasa den tempunan difísil aki i  nos ta konvensí ku  Hilward ya ta okupá un lugá importante den Reino di Señor. Ku su alma sosegá na pas.