Ultimamente por nota ku ekonomia di mundu ta kambiando di un ekonomia di servisio pa un di eksperiensia. Den e mundu kompetitivo ta sumamente imperativo ku e kliente ta satisfecho ku e eksperiensia ku e kompania ta brinda. Klientenan a bira mas eksigente na momentu di evaluá kalidat di nan eksperiensia. Den e mundu di hospitalidat i turismo, kalidat di servisio pa brinda un eksperiensia memorabel ta un elemento klave pa keda kompetitivo ku otro destinashonan. Den kuadro di e aliansa stratégiko entre Inter Continental University of the Caribbean (ICUC) i Curacao Tourism Board (CTB), ku mester garantisá desaroyo di kalidat den turismo, ICUC den koperashon estrecho ku Innovatie Centrum Curaçao (ICC) ta organisa un seminario pa asina duna mas informashon tokante importansia di ouditoria bou di restourantnan. E dos entidatnan ariba menshona a logra reklutá un eksperto den ouditoria di restourant di e Universidat di South Carolina, esta Dr. Robin DiPietro Ph.D. Dr. DiPietro, ademas di ta profesor ne Universidat,  tin mas di 20 aña di eksperiensia den operashon di restaurant, rekurso humano i entrenamentu den e area aki. Ademas e tabata konsehero pa varios kompania na Merka i internashonal, manera ‘Longhorn Steakhouse,’ ‘Burger King,’ ‘Darden Restaurants,’ Aruba Tourism Authority, i Disney.  Durante e seminario, Dr. DiPietro lo elaborá riba e rekesitonan pa un bon ouditoria, aspektonan klave di servisio na kliente den un ekonomia di eksperiensia, kiko spesifikamente un ouditoria ta nifiká pa e restourant lokal i kon krea un norma konsistente di kalidat haltu. Ministro di Asuntunan Ekónomiko, Dr. Steven Martina lo hasi apertura di e seminario. Esnan interesa por yama Srt. Sheena Garcia na ICUC pa registrá pe evento aki of manda e-mail na s.garcia@icuc.org.

E seminario lo tuma lugá na ICUC na Brionplein riba djarason dia 29 di Mei 2013 di 3or pa 6or pm.