WILLEMSTAD/ For di nan entrada den farándula lokal na a hasi un impakto. Hopi atenshon i spekulashon tabata tin rònt di e formashon di e banda ICONS by Gio. A adoptá e ‘by Gio’ komo un aksento pa identifiká e ritmo i e raisnan di Gio Fuertisimo. Sinembargo kada un di esnan ku ta konformá e frònt di banda ta un strea riba nan mes, artista di potensia ku un ‘fan base’ propio ku sigur tin un balor agregá na e organisashon. Esaki por a keda konfirmá den temporada di karnaval tambe. Hunneley, Djuric, Steven Daniels i Amos Balentin a bin ta hasi un tremendo trabou ariba i pafó di esenario kreando un otro tipo di vibrashon pa e banda.

E siman tras di lomba e organisashon a finalisá na plannan pa e segundo etapa i den esaki a disidí di ‘lòs’ for di Gio. Di akuerdo ku e organisashon di ICONS, esaki tabata algu ku lo mester a sosodé un dia, sinembargo no a premir’é asina lihé. Músika ta papia idioma klá, i ta keda adaptá di generashon pa generashon. E nobo semper lo respetá esun ku a imponé estilo, einan mes ta añadí karakter i vibrashon nobo kreando un estilo propio. Esei lo sosodé ku ICONS.  E kantantenan dilanti por haña nan mes perfektamente den e plan nobo. E organisashon a haña su mes konfrontá ku e desishon pa aserka músikonan nobo. For di awor, ICONS por konta ku Raeve ”Palo” Rog riba Conga, Derrel ”Titi” de Palm riba Drum, Quincy ”Biggy Smalls” Comenencia riba Timbal, Kevin D’Abreu de Paulo riba Bass, Kennard Maduro riba Piano, Jonathan Carolina riba Keyboard, Igort Rivas riba Trompet i Joselo Jimenez riba Trombon.  Axel Pikero lo ta riba keyboard i lo fungi komo direktor musikal pa ICONS.

Huntu ku e plan nobo, i músikonan nobo ta bin un maneho nobo tambe. ICONS lo keda manehá dor di e kas di produkshon Decoded ku a bin ta hasi un bon trabou produsiendo diferente artista lokal. Ya e tim di maneho a plania grabashon di piesanan nobo pa e próksimo temporada. Ta invitá fanatikonan pa sigui e desaroyonan di serka i keda pendiente di ICONS riba social media.