Luna di october, Luna di conscientisacion

Mary Joan Foundation durante henter aña ta traha pa conscientisa hende muher y hende homber riba prevencion di cancer di pecho. Luna di october ta e luna cu ta concentra completamente riba e parti aki, pa cual Mary Joan Foundation ta organisa varios actividad pa conmemora y pone atencion riba nan programa di conscientisacion. Durante un conferencia di prensa sra. Monique de Palm di Mary Joan Foundation, sra. Enrita Werleman di Stichting BOB y sra. Iraida Thijzen di IBiSA a informa di e unificacion pa hunto den luna di october hiba e mensahe di conscientisacion di e lucha contra cancer di pecho. E ‘Health Monitor’ cu a keda realisa e aña aki ta indica cu 33% di casonan di fayecimento na Aruba entre añanan 2000 pa 2010, ta pa causa di malesanan cardiovascular (ader y curason), sigui pa un 25% cu ta pa causa di e malesa di cancer. Resultado ta mustra cu un 50% di e cancer cu mas a keda diagnostica for di aña 2007 pa 2010 ta cancer di pecho. En conexion cu e luna di conscientisacion y e lucha contra cancer di pecho, Instituto Biba Saludabel y Activo, IBiSA ta probecha di e oportunidad pa pone enfasis riba e importancia di hiba un estilo di bida saludabel. Esaki ta bon entre otro pa:

–          Baha e risico pa haya cancer;

–          Reinforsa e curpa y mente pa surpasa y combati e enfermedad (si acaso e malesa  a bati na porta caba).

 

E trabou di prevencion contra cancer di pecho ta cuminsa cu habitonan saludabel manera:

–          Actividad físico regularmente;

–          Limita uzo di alcohol;

–          No huma;

–          Duna lechi di pecho;

–          Mantene e peso saludabel segun bo haltura y edad;

–          Haci control y screening regularmente di bo pecho.

 

Dia 24 di october e Bus di Salud di IBiSA ta na e edificio di Mary Joan Foundation cu ta situa den e cura di ATCO na Dakota. Riba e dia aki ta tuma lugar un ‘Mercado di Informacion’ y IBiSA ta uni na e causa di Mary Joan Foundation pa hiba e mensahe di prevencion y con por baha e risico pa haya cancer di pecho. Presente na e ocasion aki lo haya Koningin Wilhelmina Fonds y Stichting Bevolkingsonderzoek Borstkanker Aruba (BOB), mientras cu IBiSA lo ta presente cu un booth di informacion. Personal di e Bus di Salud lo pisa, midi y wak si e peso ta saludabel di tur cu acudi e dia aki.  Tambe lo check presion y sucu y si ta necesario ta controla e colesterol. E parti mas importante sigur ta cu lo duna conseho individual na cada persona, con por haci cambio na e estilo di bida pa bira uno mas saludabel. Di e forma aki, IBiSA ta duna su aporte y contribucion na e luna di conscientisacion y prevencion na e lucha contra cancer di pecho.