T-Shirt y Bib-Number a yega !

Inscripcion oficial a cuminsa pa e prome careda grandi di aña 2016 organisa pa IBiSA, esta e “Betico 10K Memorial Run”, popular conoci den pueblo como e ‘Careda di Betico’. E careda ta tuma lugar riba dialuna dia 25 di januari 2016 cu ta un dia liber en conexion cu celebracion di e fecha natalicio di Betico Croes den feliz memoria.

Cu yegada di e T-Shirtnan conmemorativo y e Bib-numbers pa e careda, participantenan por cuminsa inscribi na oficina di IBiSA situa na Frankrijkstraat 1, como tambe na Sport Centrum San Nicolas situa na dr. Schaepmanstraat 52 durante ora di oficina cu ta di 8’or di mainta pa 12’or di merdia y for di 1’or di merdia pa 4’ or di atardi.

E ‘Careda di Betico’ mes ta encera un 6K Fun Run & Walk cu tin un costo di participacion di Afl. 10,- pa participacion local y US$ 8,- pa atleta internacional. Premiacion den e 6K Fun Run & Walk e aña aki ta pa e prome 3 participante masculino y e prome 3 participante femenino OVERALL (ya sea bo core of cana), cu cruza linea final na Centro Deportivo Libertador Betico Croes na Sta. Cruz.

Pa e 10K Memorial Run, e costo di participacion ta Afl. 15,- pa atletanan local mientras cu pa atleta internacional esaki ta US$ 10,- . Premiacion pa e 10K ta: e prome, segundo y tercer lugar segun categoria di edad femenino y masculino manera ta e caso normal tur aña.

E careda ta start pa 6’or di mainta riba dialuna 25 di januari 2016 y ya for di 5’or ta cuminsa cu registracion.

IBiSA ta invita tur atleta pa inscribi trempan y sigura bo participacion na e careda grandi aki.