Stellaris Casino ta e prome casino den Caribe pa lansa e aplicacion. Promoviendo mas interaccion y mas contacto cu hungadonan

ORANJESTAD, Aruba – Na Aruba e ta algo nobo y den Caribe tambe e ta un innovacion completo den e industria di casino, esta introduccion di un “selfie booth” unda hungadonan por comparti nan experencia, ora nan gana, ora nan diberti of djis ora nan ta sinti cu nan tin hopi suerte. Desde dia 29 di februari 2016, Stellaris Casino na Marriott Aruba Resort ta e prome pa lansa e producto moderno aki pa nos isla.

Yazira Javois-Feliciana, Director of Marketing & Slot Performance na Aruba Marriott Resort & Stellaris Casino a presenta e producto nobo aki dialuna atardi durante un ceremonia den e casino. Nan a splica cu a haci uzo di un compania local, esta Expandeer, pa acesora nan den e aspectonan tecnologico cu e ta bin cune. Di nan banda Expandeer ta trahando cu un partner internacional cu amplio experencia den e tipo di aplicacionnan electronico asina.

Pa por uza e “Selfie Booth” aki ta masha facil pasobra e computer mes lo guia e hungado con pa saca e potret, ki background e kier uza cu e potret y e email adres unda e computer mester manda e potret. Asina cu e cliente ricibi e potret via su email den su celular, e ta “upload” riba Facebook y cu chens pa gana $50 pa por sigui hunga den e casino. E contenido di e publicacion ta keda pa cada hungado scoge, sea e kier comparti cu el a gana premio, cu e tin suerte, cu el a pasa bon y asina por sigui menciona.

“Ta bisto cu popularidad di rednan social ta subiendo, locual ta haci cu mester cuminsa evalua e avenida ey tambe pa por yega na nos hungadonan y futuro bishitantenan door di expone Stellaris Casino Aruba den bista na esunnan cu no ta na Aruba ainda y laga nan mira experiencia di nan amigonan riba social media”, asina Yazira Javois-Feliciana a duna di conoce.

Den casino specialmente no ta permiti sacamento di potret, debi na siguridad di e hungadonan y di e casino. Pero e “Selfie Booth” aki lo permiti e hungado libremente pa comparti su experiencia sin ningun problema.

E evento pa introduci e “Selfie Booth” nobo y moderno aki den Aruba Marriott Resort & Stellaris Casino a bay compaña pa un evento special pa medionan di comunicacion hunto cu Aruba Trading y su champagne marca “Moët & Chandon”. A splica miembronan di prensa con e sistema ta traha y a permiti pa nan ta e prome nan pa saca un potret y “post” riba nan pagina di Facebook y asina duna inicio na un era nobo den e industria di casino, unda hungadonan por ta mas interactivo y por comparti nan alegria y suerte cu otronan tanto na Aruba mes como tambe rond mundo.

Stellaris Casino lo sigui hunto cu “Moët & Chandon” tur diamars pa un anochi special caminda cu tur hungado cu saca nan potret na e “Selfie Booth” di Stellaris Casino lo ricibi un glas di “Moët & Chandon” como “welcome drink” y esaki lo sigui como special henter anochi pa solamente $10.

Aruba Marriott Resort & Stellaris Casino a habri na aña 1995 y ta e casino mas grandi riba nos isla. E ta conta cu mas di 160 empleado, cu ta maneha 24 wega di mesa y mas di 400 slot machines. E weganan mas popular riba mesa ta Craps, Black Jack, Three Card Poker y Roulette, mientras cu e mashinnan mas uza ta esunnan di e sistema 3D y e “mystery Progressive Jackpots”.

Na luna di januari ultimo, Stellaris Casino tabata e prome pa introduci e “I-Roulette”, e prome wega di mesa electronico. Ta obvio cu desde introduccion di e wega aki, cu mas y mas hungadonan hoben ta purba nan suerte den un forma moderno.

Stellaris Casino ta conta cu entretenimento bibo, diadomingo pa diaranson di 9:00pm pa 1:00am cu DJ Cross, diahuebs pa diasabra di 9:00pm pa 1:00 am cu diferente banda. Stellaris Casino tin Bingo tur diahuebs, diasabra y diadomingo pa 1:00pm, cu 5 wega progresivo inclui completamente gratis. E casino ta habri 24 ora pa dia pa weganan di mashin mientras cu weganan di mesa ta cuminsa pa 2:00pm te cu 4:00am.

Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.