WILLEMSTAD – Durante e promé edishon di e torneo di gòlf Old Quarterrly ku a organisá fin di febrüari na e kancha di Old Quarry na Santa Barbara Plantation, e hungadónan di gòlf a duna generosamente pa un bon meta sosial. Na nòmber di patrosinador prinsipal SFT Bank direktor Leo Rigaud a entregá un chèk di 5000 florin na señora Rianne Plaisir di Fundashon Encilia – riba potrèt. Ta trata di un fundashon ku ta bula dilanti ora surgi situashonnan di emergensia na Kòrsou pa yuda mucha, hóben i mayornan. Nan ta asistí mucha ku ta sali for di un situashon di krísis i ta respaldá mayornan ku tep di edukashon. Pa hóbennan nan a diseñá un programa preventivo ku ta yuda forma nan karakter titulá ‘Wak bo kaya’. Manera e nòmber ya ta sugerí, ta tene e torneo aki kada kuartal, kada be ku un rekoudashon pa un otro bon kousa. Por ehèmpel, e siguiente torneo lo ta djasabra dia 30 di mei i na e okashon ei e proyekto ‘50 hours live’ di Rotary Club Curaçao lo ta e instansia benefisiá.