Sra. Milka Schoop entre nominadonan BHV’ernan den henter Reino Hulandes!
ORANJESTAD, Aruba – November 2015: Durante di e siman dedica na BHV (Bedrijfshulpverlening), na Dr. Horacio E. Oduber Hospitaal a organisa diferente evento pa enfoca riba trabao di e team cu tin un funcion hopi importante den e institucion. Bao di liderazgo di Milka Schoop, e team di HVT ta traha tur dia y ta entrena y sigui “upgrade” nan mes den con pa maneha calamidadnan den y rond di e edificio di Hospital. Ta organisa diferente training y sesion di informacion durante di aña y e team ta hopi atento y activo pa cu nan rol.
John Fun, Clustermanager Facilitair Bedrijf di Hospital, a splica cu na Hospital e team ainda ta wordo yama HVT, cual ta “hulpverlenersteam”, pasobra ora cu nan a cuminsa cu e ekipo y training na 2006 ainda nan no tabata afilia na e organisacion Hulandes cu ta permiti nan uza e titulo di BVH. For di 2008 miembronan di e team di Aruba ta wordo certifica como BHV-er. E team di HVT a tuma e momento aki pa gradici sr. Sjaak Koeten di e organisacion SOTU, kende ta un experto den e area di BHV.
Hospital a habri e siman cu entrega di diferente reconocimento. John Fun a comparti cu tur aña e siman aki ta wordo celebra y e aña aki nan a haya e sorpresa grato cu sra. Milka Schoop, Manager beveiliging a keda entre e grupo di 30 nominado cu a keda na final di e seleccion pa e titulo di BHV-er van het Koninkrijk 2015, un premio prestigioso Hulandes.
A nomina Schoop pa Dr. Horacio E. Oduber Hospitaal y a keda selecciona for di e grupo di entre 700 BHV-er nomina den henter Reino Hulandes. Fun a expresa cu Hospital ta hopi orguyoso di Milka, kende tin tur e cualidadnan pa gana un premio asina; tur dia e ta bezig cu e topico di siguridad, prevencion di calamidad y accionnan pa salba bida den casonan cu cualkier calamidad presenta.
Tambe tabatin tambe un nominacion sorpresa yama “HVT held” cual a keda den persona di sra. Jessy Leon Tromp di departamento di Communicatie. Un persona semper cla pa yuda pa asina e team di HVT tin tur e materialnan necesario pa duna les, poster cu e plannan durante emergencia y tur loke ta material audiovisual. Danki Jessy pa tur bo aporte duna na HVT.
Milka Schoop, manager beveiliging y e persona tras di e team di HVT ta elabora tocante di e siman tras di lomba cu tabatin dos evento grandi; riba diamars tabatin e di dos HOH Fun & Fit Walk & Run y riba diahuebs tabatin un entrenamento di evacuacion na momento cu un edificio cay den otro.
Schoop ta splica cu e simulacro aki ta un rekesito di e seguro medico y a pidi brandweer, bureau rampenbestrijding, WEB, veiligheidsdienst y aeropuerto pa manda representantenan pa yuda evalua e training. Entre e puntonan cu tabata importante ta con lihe e BHV-team ta actua y con lihe ta logra evacua e area.
Riba dialuna, diamars y diabierna a conta tambe cu e cooperacion di parti di Cuerpo Policial, unda cu John Larmonie riba dialuna a duna un lectura encuanto di criminalidad basa, entre otro, riba casonan cu a pasa na diferente hospital den exterior. Asina el a yuda e BHV-team identifica tambe unda e hospital ta mas vulnerabel. Diamars Larmonie a bolbe y presenta un scenario di un caso di calamidad cu e miembronan di BHV mester a traha riba dje y entrega nan solucion y riba diabierna a anuncia e resultado y e ganado.
Ademas e team a pasa un encuesta entre coleganan cu no ta miembro di e team pa uza den proceso di evaluacion di team. E resultadonan lo wordo comparti y discuti durante di e reunion mensual.