Momento historico pa Dr. Horacio E. Oduber Hospitaal y Aruba

ORANJESTAD, Aruba – December 2015: Diamars, e stakeholdernan den e proyecto di renobacion y expansion di Dr. Horacio E. Oduber Hospitaal a celebra un momento historico den e proyecto cu tur bishitante, pashent y tur miembro di e personal di e institucion medico. Director Financiero, Drs. Theo de Kool RA a splica cu tabata mas cu logico cu hospital kier a celebra cu nan a yega e punto mas halto den e construccion di e beddehuis nobo cu henter e comunidad di hospital y a ofrece un dushi treat di un cupcake cu e logo di comicion di bouw di hospital y juice na tur persona cu tabata di bishita pa cualkier motibo na hospital riba diamars.

E edificio cu a yega su “top” ta unda cu tur e policlinicanan di specialista y algun otro servicio di hospital lo wordo ubica.

Tur empleado di hospital a ricibi e treat aki tambe y e pashentnan a ricibi un treat den caso cu e instruccionnan di nan dietista/nutricionista a duna espacio p’e. Un ambiente festivo a reina na hospital for di oranan di mainta. E treat a wordo hopi bon ricibi.

Theo de Kool a agrega cu e pashent semper ta e persona central den hospital, pero semper mester corda cu e empleado ta esun cu merece hopi atencion tambe, como cu si e empleado ta wordo aprecia y e ta sinti cu su trabao y esfuersonan ta wordo aprecia e ta refleha tambe den su esfuersonan pa sostene y mantene e mision di pone y mantene e pashent central.

Cu tur e cambionan tumando luga pa cu e proyecto enorme di expansion y renobacion di Dr. Horacio E. Oduber Hospitaal, e institucion a pone como e meta pa bira un di e miho hospitalnan den nos region, De Kool a conclui bisando “y ta solamente cu participacion completo di nos personal profesional y servicial cu ta traha incansablemente den e institucion na bienestar di nos pashentnan, esaki por wordo logra. Mi ta felicita tur envolvi den e trabounan di construccion y renobacion….nos Hospital ta kedando bunita”.